انسان اگر ہمت کرے تو ناممکن کو بھی ممکن بنا سکتا ہے۔ برطانیہ کی ایک 27 سالہ دلہن نے بھی اپنی قوت ارادی اور ہمت و حوصلے کا مظاہرہ کر کے دنیا کو حیران کردیا۔
غیرملکی میڈیا کے مطابق کیری ریڈ ہیڈ آنتوں کی ایسی بیماری میں مبتلا تھیں جس کے باعث وہ دن بدن کمزور ہوتی چلی گئیں، 2 سال قبل وہ چلنے پھرنے کے قابل بھی نہ رہیں اور وہیل چیئر کا استعمال کرنے لگیں۔
گزشتہ ماہ مشرقی یارک شائر میں کیری کی شادی جول ریڈ ہیڈ سے ہوئی۔
کیری اپنی زندگی کے نئے سفر کے لیے اس قدر خوش اور پرجوش تھیں کہ انہوں نے وہیل چیئر چھوڑ دی اور اپنے پیروں پر چل کر اپنے ہونے والے شوہر کے ساتھ ساتھ دنیا بھر کے لوگوں کو بھی حیران کردیا۔
سوشل میڈیا پر جاری ایک ویڈیو میں دیکھا جا سکتا ہے کہ کیری چرچ کے اندر وہیل چیئر کے بغیر داخل ہو رہی ہیں۔ ان کے انتظار میں کھڑے ان کے ہونے والے شوہر انہیں اپنی جانب اپنے پیروں پر چل کر آتے ہوئے دیکھ کر اشک بار ہوجاتے ہیں اور قریب آنے پر انہیں تھام لیتے ہیں۔
اس ویڈیو کو سوشل میڈیا پر لاکھوں مرتبہ دیکھا گیا ہے اور لوگ ان کی ہمت و حوصلے کی داد دے رہے ہیں۔ کیری کا کہنا ہے کہ وہ ان لوگوں کو مضبوط اور صحت مند بنانا چاہتی تھیں جو ان کی طرح چلنے پھرنے سے قاصر ہیں لیکن اگر وہ ہمت کریں تو وہ بھی ان کی طرح پھر سے اپنے پاؤں پر کھڑے ہوسکتے ہیں۔