اسلام آباد ہائیکورٹ: عمران خان کی نااہلی کے فیصلے کیخلاف اپیل واپس لینے کی درخواست مسترد

اسلام آباد ہائیکورٹ نے پاکستان تحریک انصاف کے چیئرمین عمران خان کی توشہ خانہ ریفرنس میں الیکشن کمیشن کے نااہلی فیصلے کے خلاف اپیل واپس لینے کی درخواست مسترد کر دی ہے۔

اسلام آباد ہائی کورٹ کے چیف جسٹس عامر فاروق نے درخواست مسترد کرنے کا فیصلہ سنایا۔

فیصلے میں کہا گیا ہے کہ الیکشن کمیشن نے 21 اکتوبر 2022 کو بانی چیئرمین پی ٹی آئی کو بطور رکن اسمبلی نااہل قرار دینے کا فیصلہ سنایا تھا، چیئرمین پی ٹی آئی نے الیکشن کمیشن کے فیصلے کے خلاف گزشتہ برس 28 اکتوبر کو ہائیکورٹ سے رجوع کیا تھا۔

فیصلے میں مزید کہا گیا کہ بانی چیئرمین پی ٹی آئی نے لاہور ہائیکورٹ میں معاملہ زیر التوا ہونے کی وجہ سے  18 جنوری 2023 کو اپیل واپس لینے کی درخواست دائر کی تھی۔

اسلام آباد ہائیکورٹ نے اپنے فیصلے میں کہا کہ 13 ستمبر کو فریقین کے دلائل سننے کے بعد عدالت نے فیصلہ محفوظ کیا تھا جس کی روشنی میں عدالت چیئرمین پی ٹی آئی کی الیکشن کمیشن کے فیصلے کے خلاف دائر کردہ اپیل واپس لینے کی درخواست مسترد کرتی ہے۔