نگراں وزیراعلیٰ پنجاب محسن نقوی نے چولستان کے بے زمین کاشتکاروں کے لیے تاریخ ساز اقدام کیا ہے، ان کی ہدایت پر45 سال سے کاشتکاروں کو اراضی کی الاٹمنٹ کا رکا ہوا کام چند ماہ میں مکمل کرلیا گیا اور 27 ہزار کاشتکاروں کو 3 لاکھ 44 ہزار ایکڑ اراضی شفاف قرعہ اندازی کے ذریعے الاٹ کر دی گئی۔
چولستان کے کاشتکاروں کو اراضی کی الاٹمنٹ کے لیے وزیر اعلیٰ آفس میں کمپیوٹرائزڈ قرعہ اندازی کا انعقاد کیا گیا۔ وزیراعلیٰ محسن نقوی نے چولستان کے کاشتکاروں کو اراضی کی الاٹمنٹ کے لیے بٹن دبا کر کمپیوٹرائزڈ قرعہ اندازی کا آغاز کیا۔
کاشتکاروں کو اراضی 5 سال کی لیز پر دی جائے گی، وزیراعلیٰ پنجاب
تقریب سے خطاب کرتے ہوئے وزیر اعلیٰ پنجاب محسن نقوی نے کہا کہ 27 ہزار کاشتکاروں کو ساڑھے 12 ایکڑ فی کس اراضی 5 سال کی لیز پر دی جائے گی، 45 برس بعد جنوبی پنجاب کے 3 اضلاع رحیم یار خان، بہاولنگر اور بہاولپور کے غریب کاشتکاروں کو ان کاحق دیا ہے۔
مزید پڑھیں
انہوں نے کہا کہ آج کا دن بہاولپور ڈویژن اورچولستان کے باسیوں کے لیے بہت اہم اور یاد گا ردن ہے، بہاولپور، رحیم یارخان اور بہاولنگر کے بے زمین کاشتکاروں کو قرعہ اندازی کے ذریعے اراضی کی الاٹمنٹ کی مبارکباد دیتا ہوں۔
ان کا کہنا تھا کہ وہ جلد چولستان آ کرقرعہ اندازی میں کامیاب کاشتکاروں کو الاٹمنٹ کے کاغذات دیں گے، ساڑھے 12 ایکڑ اراضی چولستان کے 27 ہزار کاشتکارو ں کوملے گی۔
اراضی کی الاٹمنٹ کے عمل کو شفاف بنایا گیا ہے
انہوں نے کہا کہ کاشتکاروں کو اراضی کی الاٹمنٹ کے پورے عمل کو انتہائی شفاف بنایا گیا ہے اور انتہائی سخت سکروٹنی ہوئی ہے جس میں سیشن ججز اور سرکاری حکام سمیت تمام متعلقہ لوگ شامل تھے۔
محسن نقوی نے کہا کہ 1978 سے چولستان کے لوگوں کے لیے اراضی کی الاٹمنٹ کا عمل زیرالتوا تھا جو آج مکمل ہوگیاہے، اس سے چولستان کے ہزاروں خاندانوں کو روز گار میسر ہوگا، انشا اللہ اب چولستان کے پورے علاقے میں کاشتکاری ہوگی، ویران زمین سرسبز و شاداب ہوگی اور نہری پانی بھی میسرہوگا۔
وزیر اعلیٰ نے کہا کہ اراضی کی الاٹمنٹ کے لیے بہت معمولی ریٹ رکھے گئے ہیں، کاشتکار اس زمین کو اگلی فصل میں کاشت کریں گے۔
41841 درخواست دہندگان وک شارٹ لسٹ کیا گیا ہے، وزیراعلیٰ کو بریفنگ
وزیراعلیٰ کو بریفنگ میں بتایا گیا کہ سکروٹنی کے بعد 41841 درخواست دہندگان شارٹ لسٹ کیے گئے ہیں۔ بہاولنگر، رحیم یارخان اور بہاولپور کے اضلاع میں 27 ہزار افراد کو ساڑھے 12 ایکڑ اراضی کی ایک ایک الاٹمنٹ 5 سال کی لیز پر دی جائے گی۔
صوبائی وزرا عامر میر، اظفر علی ناصر، چیف سیکرٹری زاہد اختر زمان اور سینیئر ممبر بورڈ آف ریونیو نبیل جاوید نے کمپیوٹرائزڈ قرعہ اندازی کی۔
کمشنر بہاولپور ڈویژن، ممبر کالونیز بورڈ آف ریونیو، ایم ڈی چولستان ڈویلپمنٹ اتھارٹی، ڈی جی پنجاب انفارمیشن ٹیکنالوجی بورڈ، سیکریٹری نجکاری بورڈآف ریونیو، ممبر آئی ٹی بورڈ آف ریونیو اور متعلقہ حکام بھی اس موقع پر موجود تھے جبکہ ڈپٹی کمشنر بہاولپور ویڈیولنک کے ذریعے قرعہ اندازی کی تقریب میں شریک ہوئے۔
