لاہور ہائیکورٹ میں پاک فوج کو زرعی مقاصد کے لیے دی گئی 45 ہزار 267 ایکٹر اراضی پر حکم امتناع ختم کرنے کی درخواست کی سماعت ہوئی۔ عدالت نے کیس کی مزید سماعت 23 مئی تک ملتوی کرتے ہوئے حکم امتناع میں توسیع کر دی۔
عدالت نے استفسار کیا کہ عوامی اراضی فوج کے سپرد کیسے کی گئی ہے۔ عدالت نے آئندہ سماعت پر وفاقی کابینہ کی منظوری کا ریکارڈ طلب کیا ہے۔ عدالت نے وفاقی وزارت دفاع اور بورڈ آف ریونیو کے درمیان طے پانے والے معاہدے کی کاپی بھی طلب کی ہے۔
عدالت کو بتایا گیا ہے کہ محکمہ لائیو سٹاک، محکمہ جنگلات، محکمہ زراعت اور محکمہ آبپاشی کی جانب سے جواب جمع کرا دیا گیا ہے۔ ایڈووکیٹ جنرل پنجاب شان گل، حکومت پنجاب کی طرف سے عدالت میں پیش ہوئے، انہوں نے بتایا کہ پنجاب کی منتخب کابینہ نے لیز میں توسیع کی منظوری دی تھی، موجودہ نگران کابینہ نے تو اسے پایہ تکمیل تک پہنچایا ہے۔
یاد رہے کہ صوبہ پنجاب کی نگران حکومت نے فروری 2023 میں نوٹی فکیشن جاری کیا تھا، جس میں فوج کو پنجاب کے شہروں بھکر، خوشاب اور ساہیوال میں جدید کاشت کاری کے لیے زرعی زمین الاٹ کی گئی تھی۔
