ڈپٹی چیئرمین نیب سہیل ناصر نے ملک سے ہر قسم کی بدعنوانی کے خاتمے کے عزم کا اعادہ کرتے ہوئے کہا ہے کہ ملک سے اس لعنت کو مٹانے کے لیے اجتماعی کوششوں کی ضرورت ہے۔
ان خیالات کا اظہار انہوں نے جمعرات کو نیب راولپنڈی کے زیراہتمام ’دستاویزی معیشت بدعنوانی کا خاتمہ‘ کے موضوع پر سیمینار اور انسداد بدعنوانی سے متعلق واک کے شرکا سے خطاب کرتے ہوئے کیا۔
سہیل ناصر نے کہا کہ کرپشن کی مختلف اشکال ہیں اور نیب ملک سے ہر قسم کی بدعنوانی کے خاتمے کے لیے پرعزم ہے۔
انہوں نے کہا کہ خود احتسابی اور سماجی انصاف قائم کیے بغیر بدعنوانی پر قابو نہیں پایا جا سکتا اس لیے آج ہمیں تہیہ کرنا چاہیے کہ اپنے فرائض میں کوتاہی نہیں برتیں گے اور معاشرے میں بدعنوانی سمیت ہر قسم کی برائیوں کی روک تھام میں اپنا کردار ادا کریں گے۔
ڈپٹی چیئرمین نیب نے کہا کہ منفی سوچ معاشرتی رویہ بن چکی ہے اور تنقید برائے تنقید معاشرے کو تباہ کرتی ہے۔
سیمینار سے خطاب کرتے ہوئے چیئرمین بی آئی ایس پی ڈاکٹر محمد امجد ثاقب نے کہا کہ ہمیں اپنی خود احتسابی کے ذریعے خامیوں اور نقائص کا جائزہ لینا چاہیے اور ہماری گفتار اور کردار میں ہم آہنگی ہونی چاہیے۔
ڈاکٹر محمد امجد ثاقب نے کہا کہ ہمیں اپنے حقوق، اخلاقی کردار اور اقدار پر بھی نظر ڈالنی چاہیے۔ انہوں نے مزید کہا کہ پاکستان میں سب کچھ برا نہیں ہے اور قومیں امید نہ ہونے سے زوال کا شکار ہوتی ہیں۔
ان کا کہنا تھا کہ اخوت کے ذریعے بغیر سود اور شخصی ضمانت کے چھوٹے قرضے دیے جاتے ہیں اور اس ضمن میں 60 لاکھ افراد میں 220 ارب روپے تقسیم کیے گئے اور ان کی ریکوری کی شرح 99.9 فیصد ہے۔
انہوں نے نیب کی کارکردگی کو خراج تحسین پیش کیا اور کہا کہ نیب آگاہی، تدارک اور انفورسمنٹ پر عملدرآمد کے ساتھ ساتھ خود احتسابی پر بھی عمل پیرا ہے۔
ڈی جی نیب راولپنڈی مرزا عرفان بیگ نے اپنے خطاب میں کہا کہ بدعنوانی ایک برائی ہے اور نیب اس برائی کے خاتمے کے لیے کوشاں ہے۔
انہوں نے کہا کہ معاشرے کی اجتماعی کوششوں سے ہی اس لعنت کا خاتمہ ممکن ہے۔ انہوں نے مزید کہا کہ بدعنوانی کے معیشت، سیاست اور ہر فرد پر منفی اثرات مرتب ہوتے ہیں۔
مرزا عرفان بیگ نے کہا کہ نیب نے انسداد بدعنوانی سے متعلق آگاہی پیدا کرنے کے لیے مختلف تعلیمی اداروں میں آگاہی مہم جاری رکھی۔
سابق آئی جی اسلام آباد پولیس ڈاکٹر کلیم امام نے بدعنوانی کو ایک زہر قرار دیتے ہوئے کہا کہ پاکستان سمیت پوری دنیا کو کرپشن کا سامنا ہے۔
ڈاکٹر کلیم امام نے نے کہا کہ ہمیں اپنا فرض ایمانداری سے ادا کرنا چاہیے اور اداروں کو بھی اپنی ذمے داری پوری کرنی چاہیے۔
انہوں نے سب کے بلاامتیاز احتساب کی ضرورت پر زور دیتے ہوئے کہا کہ کرپشن کی نشاندہی بھی کرنی چاہیے۔
اس موقع پر ڈپٹی چیئرمین نیب سہیل ناصر نے مصوری، تقریری مقابلوں، پوسٹرز سازی اور اسکٹس کے مقابلوں میں پوزیشن حاصل کرنے والوں میں سرٹیفکیٹس اور نقد انعامات تقسیم کیے۔
بعد ازاں شرکا نے ڈپٹی چیئرمین نیب سہیل ناصر اور ڈی جی نیب راولپنڈی مرزا عرفان بیگ کی قیادت میں نیشنل لائبریری سے نیب ہیڈکوارٹرز تک واک کا اہتمام کیا۔ ڈپٹی چیئرمین نیب نے واک کے شرکا سے خطاب بھی کیا۔
