پاکستان کے سابق کپتان شاہد آفریدی نے آسٹریلیا میں بینو قادر ٹرافی ٹیسٹ سیریز میں دلچسپ مقابلے کی توقع کا اظہار کرتے ہوئے فاسٹ بولر شاہین شاہ آفریدی کو آسٹریلیا کے خلاف پاکستان کا اہم ہتھیار قرار دے دیا۔
کرکٹ آسٹریلیا کو انٹرویو دیتے ہوئے، اپنے فاسٹ بولر داماد کے حوالے سے سابق مایہ ناز آل راؤنڈر شاہد آفریدی کا کہنا تھا کہ شاہین آفریدی کے نئی گیند سے اٹیکنگ اسپیل ہمیشہ سے اہم رہتے ہیں اور ایسا آسٹریلیا میں بھی رہے گا، وہ کسی بھی بیٹر کے لیے مشکلات پیدا کرنے کی بھرپور صلاحیت رکھتے ہیں۔
’میں سمجھتا ہوں کہ آسٹریلیا کی پچز پر وہ اپنی بولنگ سے نہ صرف خود لطف اندوز ہوں گے بلکہ بہت کچھ سیکھیں گے بھی، اپنی صلاحیتوں کے باعث وہ کسی بھی بیٹر کے لیے مشکلات پیداکرسکتے ہیں۔‘
آسٹریلیا کی موجودہ کرکٹ ٹیم پر تبصرہ کرتے ہوئے شاہد آفریدی کا کہنا تھا کہ آسٹریلیا اپنی ہوم کنڈیشن میں بہت مضبوط ٹیم ہے، بیٹنگ اور بولنگ دونوں شعبوں میں آسٹریلیا بہت متوازن ٹیم ہے، خاص طور پر ٹیسٹ کرکٹ میں ان کا بیٹنگ آرڈر بہت تگڑا ہے، یہ ایک دلچسپ مقابلہ ہوگا جو دیکھنے سے تعلق رکھتا ہے۔
مرحوم شین وارن سے متعلق سوال پر، شاہد آفریدی نے شین وارن کیخلاف کرکٹ کھیلنے کے تجربہ کو شاندار قرار دیتے ہوئے کہا کہ انہیں عظیم لیگ اسپنر سے بہت کچھ سیکھنے کا موقع ملا، وہ ایک شاندار میچ ونر اور فائٹر تھے۔
مزید پڑھیں
’شین وارن کا جارحانہ اسٹائل ان کی کارکردگی کی بنیاد پر انہیں جچتا تھا، میں نے ان سے بہٹ سیکھا، وہ میری بولنگ کو سراہتے تھے اور بولنگ ٹپس بھی دیا کرتے تھے، ان کے ساتھ کرکٹ کھیلنا میرے لیے اعزاز کی بات ہے، وہ میدان کے باہر بھی زندگی سے بھرپور تھے۔‘
آسٹریلیئن ٹیم کی مجموعی طور پر تعریف کرتے ہوئے شاہد آفریدی نے کہا کہ پاکستانی کرکٹ ٹیم میں ان کی موجودگی کے دوران دونوں ملکوں کے مابین دلچسپ کرکٹ سیریز کھیلی جاچکی ہیں، آسٹریلیا ہمیشہ سے جسمانی اور اعصابی طور پر ایک مضبوط ٹیم رہی ہے، وہ ہمیشہ ایک یونٹ کی طرح کھیلتے ہیں اور اپنی کارکردگی سے لطف اٹھاتے ہیں۔
’کرکٹ کے میدان میں آسٹریلیئن شاندار قسم کے اتحاد اور ڈسپلن کا مظاہرہ کرتے ہیں، خوش قسمت ہوں کہ عالمی کرکٹ کے چند بڑے ناموں میں شامل آسٹریلیا کے بہترین کھلاڑیوں کے خلاف کرکٹ کھیلی۔‘
