پاکستان پیپلزپارٹی کے چیئرمین بلاول بھٹو زرداری نے کہا ہے کہ رائیونڈ کا وزیراعظم کوشش کر رہا ہے کہ اسے چوتھی بار سلیکٹ کیا جائے، لیکن میں یہ پوچھنا چاہتا ہوں کہ 3 بار وزیر اعظم بن کر فیل ہونے والا چوتھی بار وزیر اعظم بن کر کون سا تیر مار لے گا۔
لوئر دیر میں ورکرز کنونشن سے خطاب کرتے ہوئے بلاول بھٹو زرداری نے کہا کہ ذوالفقار علی بھٹو نے عوام کو ووٹ کی طاقت دلوائی، ایک نہتی لڑکی نے عوام کے حقوق کے لیے جدوجہد کی، ایک نہتی لڑکی نے آمروں کا مقابلہ کیا۔ پیپلزپارٹی نے خیبرپختونخوا کو شناخت دلوائی۔
بلاول بھٹو نے کہا کہ پیپلزپارٹی نے بے نظیر انکم سپورٹ پروگرام (بی آئی ایس پی) جیسا انقلابی پروگرام متعارف کرایا، قائد عوام ملک کے غریب طبقے کے نمائندے تھے، آصف زرداری نے سی پیک کی بنیاد رکھی۔
مزید پڑھیں
بلاول بھٹو کا کہنا تھا کہ پاکستان کی سیاست میں پرانا طریقہ چلتا آرہا ہے، پاکستان میں نفرت اور تقسیم کی پرانی سیاست کی جارہی ہے، ایک جماعت کا ارادہ ہے کہ الیکشن جیت کر انتقام لے، ایک جماعت کا ارادہ ہے کہ الیکشن جیت کر انتقام لے سکے، یہ سیاسی اختلاف کے بجائے ذاتی دشمنی پر اتر آئے ہیں۔
چیئرمین پیپلزپارٹی بلاول بھٹو نے پی آئی اے کی نجکاری پر اعتراض اٹھاتے ہوئے کہا کہ ہم پی آئی اے کے ملازمین کے ساتھ کھڑے ہیں، کسی صورت میاں برادران کو پی آئی اے نہیں خریدنے دیں گے۔
انہوں نے کہا کہ زمان پارک کے وزیراعظم نے عوام سے جھوٹے وعدے کیے تھے، انہوں نے اپنا موقع ضائع کر دیا ہے، زمان پارک کے وزیراعظم کے دور میں انتقامی سیاست عروج پر تھی۔ بانی پی ٹی آئی سے صرف یہ اختلاف تھا کہ وہ سیلیکٹ ہوکر آئے تھے۔
سابق وزیرخارجہ بلاول بھٹو نے کہا کہ نفرت اور تقسیم کی سیاست کو دفن کرنا ہوگا، عوام نے ساتھ دیا تو پیپلزپارٹی حکومت بنائے گی، پیپلزپارٹی نے ہمیشہ الیکشن کامطالبہ کیا اور سلیکشن کےخلاف کام کیا۔
