وفاقی وزیر اطلاعات مرتضیٰ سولنگی نے کہا ہے کہ الیکشن کمیشن انتخابی شیڈول 16 دسمبر سے قبل جاری کر دے گا۔ عام انتخابات 8 فروری کو ہی ہوں گے، کسی کو شک نہیں ہونا چاہیے۔
اسلام آباد میں ’خواتین کی سیاست میں شمولیت‘ کے موضوع پر منعقدہ فورم سے خطاب کرتے ہوئے ان کا کہنا تھا کہ خواتین ہماری آبادی کا نصف ہیں۔ انتخابی عمل میں خواتین کا فعال کردار بہت ضروری ہے۔ خواتین کو بااختیار بنانا ایک مقدس فرض ہے۔
مزید پڑھیں
مرتضیٰ سولنگی نے کہا کہ مسلم دنیا میں پہلی خاتون وزیراعظم پاکستان سے تھیں۔ صنفی امتیاز کے خاتمے کا آغاز گھر سے ہی ہونا چاہیے۔ ہر گھر میں بیٹیوں کو بیٹوں کے برابر حقوق ملنے چاہئیں۔ صرف قوانین بننے سے صنفی امتیاز کا خاتمہ ممکن نہیں۔ خواتین کو برابر کے حقوق دینے کے لیے ہمیں اپنی سوچ بدلنا ہوگی۔
