پاکستان پیپلزپارٹی (پی پی پی) کے چیئرمین بلاول بھٹو نے کہا ہے کہ ہم اقتدار میں آکر غریب عوام کے لیے ملک بھر میں 30 لاکھ گھر بنا کر قائد عوام ذوالفقار علی بھٹو کا وعدہ پورا کریں گے۔
پشاور میں پی پی پی خواتین ونگ کے ورکرز کنونشن سے خطاب کرتے ہوئے بلاول بھٹو نے کہاکہ ہماری حکومت بننے کے بعد نوجوانوں کے ساتھ ساتھ خواتین کو بھی روزگار فراہم کیا جائے گا۔
انہوں نے کہاکہ ہمارے بینک اشرافیہ کو قرضے دیتے ہیں جہاں سے واپس کچھ نہیں ملتا، ہم ڈویژن کی سطح پر خواتین بینک بنائیں گے جہاں سے صرف خواتین کو ہی کاروبار کے لیے قرض ملے گا۔
مزید پڑھیں
بلاول بھٹو نے کہاکہ خواتین کا ساتھ رہا تو پیپلزپارٹی 2024 کے انتخابات میں کامیابی حاصل کرے گی، خواتین نے پیپلزپارٹی میں ہمیشہ صف اول کا کردار کیا۔
انہوں نے کہاکہ مشکل وقت میں بھی پیپلزپارٹی کی خواتین صف اول میں کام کرتی رہی ہیں، جنرل ضیا کی آمریت میں بیگم نصرت بھٹو اور بینظیر بھٹو نے بھرپور کردار ادا کیا اور پھر بینظیر بھٹو مسلم امہ کی پہلی مسلمان وزیراعظم بنیں۔
چیئرمین پی پی پی نے کہاکہ ہم خواتین کے لیے زندگی کے ہر شعبے میں مساوی مواقع چاہتے ہیں، مرد و خواتین شانہ بشانہ کام کریں تو ملک ترقی کر سکتا ہے، خواتین کے لیے سب سے ترقی پسند منشور پیپلزپارٹی کا ہو گا۔
خواتین کا ملکی سیاست میں اہم کردار ہے
انہوں نے کہاکہ خواتین کی جدوجہد کی وجہ سے پیپلزپارٹی کو بہت کامیابیاں ملیں، خواتین کی اس طرح خدمت کرنا چاہتا ہوں جیسے بیٹا اپنی والدہ کی کرتا ہے۔
بلاول بھٹو نے کہاکہ خواتین کا ملک کی سیاست میں اہم کردار ہے، ہم اقتدار میں آکر بینظیر انکم اسپورٹ پروگرام میں اضافہ کریں گے۔
انہوں نے کہاکہ آج کل افغانستان میں خواتین کو تعلیم سے محروم رکھا جا رہا ہے جبکہ پاکستان میں بھی اس سوچ کے حامل لوگ موجود ہیں مگر ان کو میرا پیغام ہے کہ بلاول بھٹو کے ہوتے ہوئے ایسا ممکن نہیں۔
بلاول بھٹو نے مزید کہاکہ پیپلزپارٹی کی حکومت میں بچے کی پیدائش کے بعد غذائی ضروریات کے لیے فنڈ ملیں گے۔
