پی ٹی آئی میں آنا پاگل پن ہے تو ہاں میں پاگل ہوں، لطیف کھوسہ

سینئر وکیل اور پیپلز پارٹی کے سابق رہنما لطیف کھوسہ نے پاکستان تحریک انصاف میں شمولیت کا اعلان کر دیا۔ انہوں نے کہا کہ بانی چیئرمین پاکستان تحریک انصاف (پی ٹی آئی) کی خواہش پر تحریک انصاف میں شمولیت اختیار کر رہے ہیں، فیصلہ ملک اور جمہوریت کے مفاد میں کیا گیا ہے۔

لاہور میں میڈیا سے گفتگو کرتے ہوئے لطیف کھوسہ نے پی ٹی آئی میں شمولیت کا اعلان کرتے ہوئے کہا کہ پاکستان کے لیے محبت، امن اور بھائی چارے کے سفر کے آغاز کی دعوت دیتا ہوں، امید ہے نفرتوں کی سیاست ختم ہو گی۔ انہوں نے پارٹی مفلر بھی پہن رکھا تھا۔

لطیف کھوسہ کا کہنا تھا کہ آئین ایسا عمرانی معاہدہ ہے جس میں تمام فلاحی مملکتوں کے خدوخال ہیں، جب جب آئین سے انحراف کیا ریاست اور آئین کو نقصان پہنچا۔

’وکالت ہو یا سیاست ہمیشہ عبادت سمجھ کر کی ہے، پہلی وفاداری دھرتی ماں سے ہے۔‘

انہوں نے مزید کہا کہ لوگ پی ٹی آئی چھوڑ رہے ہیں تم پاگل ہو جو شامل ہوگئے ہو، اگر یہ پاگل پن ہے تو ہاں میں پاگل ہوں۔ سچ کی آواز شدت سے بلند کرنے کے لیے پی ٹی آئی میں شمولیت کا فیصلہ کیا۔

سردار لطیف کھوسہ کا کہنا تھا یہ ادارے ہمارے ادارے ہیں، یہ فوج ہماری فوج ہے، آئین میں تمام اداروں کی حدودو قیود متعین ہیں، آئین میں درج ہے کہ فوج سرحدوں کی محافظ ہے اور عوام کے ٹیکسز سے ان کو تنخواہیں ملتی ہیں۔

انہوں نے کہا کہ ججز کے فرائض میں ہے کہ وہ انصاف فراہم کریں، قانون پر عملداری، آئین کی پاسداری کرنے والا امر ہو جاتا ہے، توقع کرتے ہیں کہ آج عدلیہ برابر کا انصاف کرے گی، 25 کروڑ عوام آپ کی طرف دیکھ رہے ہیں۔

یاد رہے کہ چند ماہ قبل پاکستان پیپلز پارٹی نے پالیسی سے انحراف کرنے اور عمران خان کی وکالت کرنے پر لطیف کھوسہ کو شوکاز نوٹس جاری کیا تھا، جواب جمع نہ کرانے پر پیپلز پارٹی نے لطیف کھوسہ کی بنیادی پارٹی رکنیت معطل کر دی تھی، جس کے بعد آج انہوں نے پی ٹی آئی میں شمولیے اختیار کر لی۔