اسلام آباد کیپیٹل سٹی پولیس آفیسر کے خصوصی احکامات پر گھر گھر جاکر ملازمین و کرایہ داروں کی رجسٹریشن کے لیے ’ناک دی ڈور‘ مہم کا سلسلہ جاری ہے، تھانہ سیکریٹریٹ کی حددو میں 551 گھروں کے 229 گھریلو ملازمین کے کوائف کا اندراج مکمل کر لیا گیا۔
مہم میں اسلام آباد کیپیٹل پولیس کی مختلف ٹیمیں گلی ومحلوں میں جاکر کرایہ داروں اور گھریلو ملازمین کے اندراج کو یقینی بنارہی ہیں تاکہ شہر میں امن و امان کی فضا کو برقرار رکھتے ہوئے کسی بھی ناخوشگوار واقعہ سے بچا جا سکے۔
’ناک دی ڈور‘ مہم کا سلسلہ جاری ہے، ترجمان اسلام آباد پولیس
پولیس ترجمان کی طرف سے جاری بیان کے مطابق اسلام آباد کیپیٹل سٹی پولیس آفیسر ڈاکٹر اکبر ناصرخان کے خصوصی احکامات کی روشنی میں اسلام آباد کیپیٹل پولیس کا وفاقی دارالحکومت میں شہریوں کے جان و مال کے تحفظ کو یقینی بنانے کے لیے اہم اقدام اٹھاتے ہوئے گھر گھر جاکر ملازمین و کرایہ داروں کی رجسٹر یشن کے لیے ’ناک دی ڈور‘ مہم کا سلسلہ جاری ہے۔
اس مہم کے دوران اسلام آباد کیپیٹل پولیس کی مختلف ٹیمیں گلی ومحلوں میں جاکر کرایہ داروں اور گھریلو ملازمین کے کوائف کے اندراج کو یقینی بنارہی ہیں، اس سلسلے میں انسداد دہشتگردی ڈیپارٹمنٹ اسلام آباد نے تھانہ سیکریٹریٹ کے علاقے میں 551 گھروں کے 229 گھریلو ملازمین کے کوائف کا اندراج مکمل کیا۔
اس مہم کا مقصد امن و امان کی فضا کو برقرار رکھنا ہے
اسلام آباد کیپیٹل سٹی پولیس آفیسر نے کہاکہ اس مہم کا مقصد وفاقی دارالحکومت اسلام آباد میں امن و امان کی فضا کو برقرار کھنا ہے تاکہ کسی بھی ناخوشگوار واقع سے بچا جاسکے۔
انہوں نے مزید کہاکہ کرایہ دار وں اور گھریلو ملازمین کے کوائف کے اندراج سے نا صرف شرپسند عناصر پر کڑی نظر رکھی جاسکتی ہے بلکہ کسی بھی قسم کی مشکوک سرگرمی میں ملوث عناصر کوغیر قانونی سر گرمیوں سے روکا جاسکتا ہے۔
انہوں نے کہاکہ اندراج نہ کروانے کی صورت میں کوئی بھی شر پسند عناصر عام شہری کا روپ ڈھال کر چوری اور ڈکیتی جیسی سنگین وارداتوں میں ملوث ہوکر نقصا ن پہنچاسکتاہے۔ اسلام آباد کیپیٹل پولیس اپنے تمام تر وسائل بروئے کار لاتے ہوئے وفاقی دارالحکومت کے شہریوں کو ایک محفوظ ترین ماحول فراہم کرنے کے لیے ہمہ وقت کوشاں ہے۔
