معروف امریکی ٹریول میگزین (گلوبل ٹریولر) کے قارئین نے استنبول ایئرپورٹ کو ‘دنیا کا بہترین ایئرپورٹ’ قرار دیا ہے۔
گلوبل ٹریول میگزین کے مطابق قارئین نے ترکیہ کے استنبول ایئرپورٹ کو دینا کے بہترین ایئرپورٹس میں سے پہلا نمبر دیا ہے، میگا ایئرہب کو یورپ کا بہترین ہوائی اڈے کے طور پر بھی منتخب کیا گیا ہے۔
ٹریول میگزین کے تقریباً 500,000 ماہانہ قارئین نے اپنے حقیقی تجربات کی بنیاد پر سفر سے متعلق خدمات، رہائش، ہوٹلز اور کروز ٹرپس پر ووٹ دیا۔
ووٹنگ میں میگزین کے 80 فیصد سے زائد قارئین نے استنبول ایئرپورٹ کو دنیا کا بہترین ایئرپورٹ قرار دیا ہے۔
دنیا کا بہترین ایئرپورٹ پورٹ قرار دیے جانے پر استنبول ایئرپورٹ کے مواصلات کے ڈائریکٹر گوخان سینگول نے کہا ہے کہ ’گلوبل ٹریولر کے قارئین کی جانب سے نمبر ون قرار دیے جانا ہماری انتہائی قابل قدر کامیابی ہے اور ہمارے ہر رکن کی طرف سے لگن، محنت اور عمدگی کا ثبوت ہے۔‘
واضح رہے کہ گلوبل ٹریولر کے زیر اہتمام گیارہویں ‘لیزر لائف اسٹائل ایوارڈز’ میں استنبول ہوائی اڈے کو دوسری بار بہترین ایئرپورٹ کے طور پر ووٹنگ کے لیے منتخب کیا گیا تھا۔
یہاں یہ بات بھی قابل ذکر ہے کہ ترکیہ کے صدر رجب طیب اردوغان نے جدید ترکی کے قیام کی 95ویں سالگرہ(2018ء) کے موقع پر استنبول ایئرپورٹ کی اپ گریڈیشن منصوبے کا افتتاح کیا تھا۔
منصوبے کے تحت پہلے مرحلے میں 2021 تک استنبول ایئرپورٹ میں سالانہ نو کروڑ مسافروں کی گنجائش تھی، جس کے بعد 2023 تک اسے بڑھا کر 15 کروڑ اور پھر 2028 تک 20 کروڑ تک پہنچانے کا منصوبہ بنایا گیا ہے۔
