کراچی پاکستان کا سب سے بڑا شہر ہے اور یہی وجہ ہے کہ ہر جماعت کی خواہش ہوتی ہے کہ وہ اپنے بڑے لیڈرز کو یہاں سے انتخابی دنگل میں اتارے، اس بار مسلم لیگ ن کی جانب سے میاں شہباز شریف اور مریم نواز میدان میں اتر چکے ہیں۔
پاکستان تحریک انصاف کی جانب سے اب تک کراچی میں مرکزی قیادت نہیں اتر سکی۔ اس سے قبل عمران خان نے علی رضا عابدی کو کراچی سے شکست دی تھی۔ ذرائع کے مطابق اس بار پی ٹی آئی کی جانب سے کسی خاتون رہنما کو کراچی سے ٹکٹ دیا جائے گا۔
مزید پڑھیں
دوسری جانب چیئرمین پاکستان پیپلز پارٹی بلاول بھٹو زرداری کا بھی لیاری سے الیکشن نہ لڑنے کا امکان ہے۔ پیپلز پارٹی ذرائع کے مطابق بلاول بھٹو زرداری کو پارٹی نے قمبر شہدادکوٹ شہید ذوالفقار بھٹو کے آبائی حلقے سے میدان میں اُتارنے کا فیصلہ کیا ہے۔
جبکہ بلاول بھٹو زرداری کو کراچی کے جیالوں کی جانب سے لیاری سے انتخاب لڑنے کی اپیل کی جا رہی ہے۔ اب تک پی پی چیئرمین نے لیاری سے کاغذات نامزدگی بھی وصول نہیں کیے۔
پیپلز پارٹی ذرائع کے مطابق پی پی پی چیئرمین بلاول بھٹو زرداری کل لاڑکانہ اور قمبر شہدادکوٹ کے حلقوں کے لیے کاغذات نامزدگی جمع کرائیں گے، جبکہ لیاری سے آصفہ بھٹو زرداری کو میدان میں اتارنے کا ارادہ ظاہر کیا جا رہا ہے۔
ذرائع کے مطابق عام انتخابات 2018 میں پاکستان تحریک انصاف کے ٹکٹ سے شکور شاد نے بلاول بھٹو زرداری کو شکست دی تھی اور اس بار شکور شاد دیگر امیدواروں کے ساتھ مل کر آزاد حیثیت سے پیپلز پارٹی کا مقابلہ کرنے کے لیے میدان میں موجود ہیں جس کے باعث پیپلز پارٹی نہیں چاہتی کے ایک بار پھر بلاول کو لیاری سے شکست کا سامنا کرنا پڑے۔
