پشاور پولیس نے پشتو کی معروف گلوکارہ گل پانڑہ کی ایک جھلک دیکھنے کے لیے اس کے گھر کے باہر گھنٹوں کھڑا رہنے والے مبینہ مداح کو اُس وقت گرفتار کرلیا جب اس نے زبردستی گھر میں گھسنے کی کوشش کی اور گھر والوں کو دھمکیاں دیں۔
پشاور پولیس نے مبینہ مداح کی گرفتاری کی تصدیق کرکے بتایا کہ ملزم اس سے پہلے بھی تین بار گلوکارہ کے گھر میں زبردستی گھسنے کی کوشش پر گرفتار ہوا تھا۔ تازہ ترین واقعے میں تھانہ شرقی پولیس نے ملزم کو گرفتار کرنے کے بعد گلوکارہ گل پانڑہ کےبھائی کی مدعیت میں ایف آئی آر درج کر دی۔ جس کے مطابق ملزم کی شناخت عبداللہ کے نام سے ہوئی ہے، وہ افغان کالونی کا رہائشی ہے۔
ملزم نے زبردستی گھر میں گھسنے کی کوشش کی
گل پانڑا کے بھائی نے پولیس کو بتایا کہ آج صبح کے وقت ملزم موٹرسائیکل پر آیا۔ وہ ان کے گھر کے باہر کھڑا تھا اور پھر مبینہ طور پر زبردستی ان کے گھر میں گھسنے کی کوشش کی جس پر گھر والوں نے انھیں پکڑ لیا۔ ملزم نے لڑائی اور شور شرابا کرنے کی کوشش کی۔ ایف آئی آر کے مطابق مدعی نے بتایا کہ ملزم انھیں جان سے مارنے کی دھمکیاں دے رہا ہے جس کی وجہ سے وہ بہت پریشان ہیں۔ ان کی زندگی گھر تک محدود ہو کر رہ گئی ہے۔
ملزم تین بار گھر میں گھسنے کی کوشش پر گرفتار ہوا تھا
گل پانڑا کے بھائی نے پولیس کو بتایا ہے کہ ملزم نے اس سے پہلے بھی تین بار زبردستی ان کے گھر میں گھسنے کی کوشش کی تھی۔ پہلی بار جب اس نے کوشش کی تھی تو گھر والوں نے شور مچایا تو ملزم موٹر سائیکل چھوڑ کر فرار ہو گیا تھا۔ جس کے بعد اسے پولیس کے حوالے کیا گیا تھا۔ دوسری بار اور تیسری بار کوشش کے دوران بھی اسے پکڑ کر پولیس کے حوالے کیا گیا تھا۔ بعدازاں اس کے بھائیوں کی یقین دہانی اور ضمانت پر بغیر کسی کاروائی کے ان کے حوالے کیا گیا تھا۔
ملزم گل پانڑا کا مداح ہے، ذہنی صحت ٹھیک نہیں
پولیس کے مطابق ملزم گلوکارہ گل پانڑا کا فین ہے۔ وہ ان سے ملنے کے لیے ان کے گھر کے باہر اکثر بیٹھا رہتا ہے۔ متعدد بار اسے منع بھی کیا گیا لیکن وہ باز نہیں آتا۔ پولیس نے بتایا کہ ملزم کی ذہنی حالت درست نہیں ہے۔ اس وجہ سے وہ ایسی حرکات کرتا رہتا ہے۔ پولیس نے بتایا کہ ملزم ان کی حراست میں ہے۔ اس سے مزید پوچھ گچھ جاری ہے۔
