قومی کرکٹ ٹیم کے فاسٹ بولر حسن علی نے کہا ہے کہ دوسرے ٹیسٹ میچ پر فی الحال ہماری گرفت ہے، کل آسٹریلیا کو 250 پر آؤٹ کرنے کی کوشش ہوگی۔
پہلے دن کا کھیل ختم ہونے پر حسن علی نے پریس کانفرنس میں کہا کہ بولنگ یونٹ کے لیے پہلا دن اچھا رہا، ہم نے رنز کم دیے، کوشش ہوگی کل آسٹریلیا کو 250 پر آوٹ کردیں، میچ پر فی الحال ہماری گرفت ہے۔
مزید پڑھیں
ایک سوال کے جواب میں ان کا کہنا تھا کہ کھانے کے وقفے سے پہلے ہم نے خراب بولنگ کی، ہم نے ایک موقع بھی ضائع کیا اگر وہ کیچ پکڑ لیا جاتا تو ابھی نتائج مختلف ہوتے، اگر ہم نے آسٹریلیا کو 250 سے کم رنز میں آؤٹ کر لیا تو ہم میچ جیت سکتے ہیں۔
انہوں نے مزید کہاکہ رفتار کس بولر کی کم ہوئی انہیں نہیں معلوم اور انہوں نے کبھی 150 کی اسپیڈ سے بولنگ نہیں کی، وہ افواہوں پر دھیان نہیں دیتے۔
واضح رہے کہ 3 میچز پر مشتمل ٹیسٹ سیریز کے دوسرے میچ میں پہلے روز کا کھیل ختم ہوگیا۔ بارش کی وجہ سے پہلے روز 66 اوورز کا کھیل ہوسکا اور آسٹریلیا نے 3 وکٹوں کے نقصان پر 187 رنز بنائے۔
آسٹریلیا کو پاکستان کے خلاف 3 ٹیسٹ میچوں کی سیریز میں 0-1 کی برتری حاصل ہے۔