دورہ آسٹریلیا پر موجود پاکستان ٹیم فٹنس مسائل سے پریشان ہے۔ خرم شہزاد کے بعد اسپنر نعمان علی بھی ٹیسٹ سیریز سے باہر ہوگئے۔ نعمان علی کا میلبورن اسپتال میں اپینڈیکس کا آپریشن ہوا۔ جس کے باعث وہ سیریز میں کھیل نہیں سکیں گے۔
پاکستان کرکٹ بورڈ کے میڈیا سیل کے مطابق نعمان علی نے گزشتہ روز اچانک پیٹ میں شدید درد کی شکایت کی، جس کے نتیجے میں انہیں فوری طور پر ایمرجنسی لے جایا گیا جہاں ان کا معائنہ اور اسکین کیے گئے جس میں اپینڈیکس کی تشخیص ہوئی۔
سرجن کے مشورے پر آج صبح ان کی لیپروسکوپک اپینڈیکٹومی کروائی گئی۔ سرجری کے بعد وہ بہتر ہیں، آج شام میں انہیں اسپتال سے ڈسچارج کر دیا جائے گا تاہم ڈاکٹر نے نعمان علی کو مکمل آرام کا مشورہ دیا ہے۔ پہلے ٹیسٹ سے قبل نعمان علی کی انگلی میں کٹ لگ گیا تھا جس کی وجہ سے وہ پرتھ ٹیسٹ کے لیے دستیاب نہیں تھے۔
Noman Ali ruled out of the Test series against Australia
Read more ⤵️ https://t.co/yVRyLIaIYk
— PCB Media (@TheRealPCBMedia) December 23, 2023
یاد رہے کہ مسٹری اسپنر ابرار احمد بھی آسٹریلیا میں انجری کا شکار ہیں۔ ان کے متبادل کے طور پر آف اسپنر ساجد خان کو فوری طور پر آسٹریلیا بلایا گیا تھا جو اس وقت میلبورن میں ٹیم کے ساتھ ہیں۔ میلبورن ٹیسٹ 26 سے 30 دسمبر تک کھیلا جائے گا۔
