کراچی میں کے الیکٹرک کی جانب سے ’غیر حقیقی‘ بلوں نے جہاں شہریوں کو ایک ذہنی اذیت میں مبتلا کیا ہوا ہے وہیں بر وقت ادائیگی نہ کرنے والوں کو ہراساں کرنے کا سلسلہ بھی جاری ہے۔
دیگر شہریوں کی طرح اورنگی ٹاؤن کی ایک نوجوان خاتون کو بھی ایسی ہی صورتحال کا سامنا کرنا پڑا بلکہ جب انہوں نے اس حوالے سے آواز اٹھائی تو انہیں کے الیکٹرک کے خلاف وہ احتجاج مہنگا بھی پڑ گیا۔ خاتون کو ایک تو تھانے میں گھسیٹا گیا اور پھر جب گرفتاری کے خوف سے انہوں نے معافی مانگی تو اس کی ویڈیو بھی وائرل کردی گئی۔
مذکورہ خاتون کا بجلی کا موجودہ بل 7ہزار 971 روپے تھا جبکہ گزشتہ ماہ 11 ہزار روپے کی ادائیگی کے بعد ٹوٹل بقایاجات 38 ہزار روپے تھے۔
مزید پڑھیں
جب خاتون نے کنکشن منقطع کرنے کو آئے عملے کو بتایا کہ انہوں نے گزشتہ ماہ 11 ہزار روپے کا بل جمع کرایا تھا اور بل کے باقی ماندہ پیسے وہ اگلے مہینے جمع کرادیں گی تو عملے نے ان کی ایک نہ سنی۔
خاتون بجلی کاٹنے والے عملے سے بل جمع کرانے کی مہلت مانگتی رہیں لیکن جب عملے نے ان کی درخواست ماننے سے انکار کردیا تو وہ کے الیکٹرک کے ٹرک پر چڑھ گئیں جو عملے کو انتہائی ناگوار گزرا اور نتیجہ یہ نکلا کہ اس احتجاج پر خاتون کو تھانے جانا پڑگیا۔
ان خاتون کے خلاف تھانے میں کے الیکٹرک کی جانب سے شکایت درج کروادی گئی جس کے بعد انہیں تھانے بلوالیا گیا۔ بعد ازاں خاتون نے معافی مانگ لی۔ تاہم بات یہیں تک نہیں رہی بلکہ معافی مانگتے ہوئے خاتون کی ویڈیو سوشل میڈیا پر شیئر کردی گئی۔
نیلام ہو گئی عزت کراچی کی غریب بیٹی کی
گزشتہ دنوں خاتون نے کے الیکٹرک کےاہلکاروں کو بجلی کانٹے سے روکا تھا۔پھر کے الیکٹرک نے انکےخلافFIRدرج کرادی۔اب یہ حالات ہیں
کیونکہ یہ عام شہری ہے تنہا ہے کسی تاجر برادری سے انکا تعلق نہیں ہے تو یہ تنہا ہے۔#KElectric pic.twitter.com/tgZjVHH9zT— محمد بلال (@BBN_011) December 26, 2023
کے الیکٹرک نے الزام عائد کیا ہے کہ کنکشن منقطع کرنے جانے والی ٹیم سے خاتون نے بدسلوکی کی تھی اور پھر مقدمہ درج ہونے کے خو ف سے پولیس اسٹیشن میں رونا پیٹنا شروع کردیا۔
اقبال مارکیٹ تھانہ پولیس کا کہنا ہے کہ خاتون کے خلاف کےالیکٹرک نے شکایت درج کروائی تھی جس پر انہیں تھانے طلب کیا گیا تھا اوردونوں فریقین کی باہمی رضامندی پر صلح کروادی گئی۔
گزشتہ روز سوشل میڈیا پر ویڈیو وائرل ہوئی تھی جس میں خاتون تھانے میں زمین پر گرے ہوئے کے الیکٹرک عملے سے معافی مانگ رہی تھیں۔
گو یہ پتا نہیں چل سکا کہ آیا وہ ویڈیو بنانا اور شیئر کرنا کسی کا ذاتی فعل تھا یا وہ گھناؤنا عمل کے الیکٹرک کے اشارے پر کیا گیا تھا تاہم دونوں صورتوں میں خاتون کی عزت نفس ضرور مجروح ہوئی۔ پولیس کا کہنا ہے کہ خاتون کی ویڈیو بنانے والے 2 افراد تھے جن کے خلاف سرکار کی مدعیت میں مقدمہ درج کرلیا گیا ہے اور گرفتاری کے لیے ان کی تلاش جاری ہے۔
