اسلام آباد میں الیکشن ٹریبونل جسٹس ارباب محمد طاہر نے اب تک دائر کی گئی تمام درخواستوں کو یکجا کردیا ہے اور الیکشن کمیشن کو تمام درخواستوں پر جمعہ کے روز جواب جمع کرانے کا حکم دیدیا ہے۔
عدالت نے الیکشن کمیشن کو آر او سے ریکارڈ لیکر تمام درخواستوں پر پیراوائز کمنٹس جمع کرانے کی ہدایت کی ہے۔
عدالت نے کہا کہ جن امیدواروں کے بلز یا کوئی بھی بھی ادائیگیاں تھیں، آر او انہیں ادائیگیوں کے لیے وقت دینے کا مجاز تھا۔
الیکشن ٹریبونل نے سوال اٹھایا کہ اختیار ہونے کے باوجود اعتراضات دور کرنے کے لیے آر او نے امیدواروں کو وقت کیوں نہیں دیا؟
واضح رہے کہ پاکستان تحریک انصاف (پی ٹی آئی) کے رہنما شعیب شاہین، نیاز اللہ نیازی، سید ظفر علی شاہ اور دیگر نے کاغذات نامزدگی مسترد کیے جانے کے خلاف الیکشن ٹریبونل میں اپیلیں دائر کی تھیں۔
