پاکستان الیکشن کمیشن نے قومی اور چاروں صوبائی اسمبلیوں کے انتخابات کے لیے پوسٹل بیلٹ کے حصول کی تاریخ 22 جنوری مقرر کردی۔
الیکشن کمیشن کی طرف سے جاری اعلامیے کے مطابق سرکاری ملازمین مسلح افواج کے ممبران ان کے اہل خانہ جو رجسٹرڈ ووٹرز ہیں اور عارضی طور پر وہ اپنے حلقے کی بجائے کسی دوسری جگہ پر ملازمت کے سلسلے میں رہائش پذیر ہیں پوسٹل بیلٹ کے استعمال کے اہل ہوں گے۔
علاوہ ازیں ایسے خصوصی افراد جن کے پاس خصوصی افراد والے نادرا سے جاری شدہ قومی شناختی ہیں اور وہ سفر کرنے سے قاصر ہیں یا ایسے جو انتخابی ڈیوٹی پر مامور ہیں جن میں ریٹرننگ افسران ، پولیس اہلکار شامل ہیں کو بھی ہدایت کی گئی ہے کہ وہ پوسٹل بیلٹ کے ذریعے اپنے حق رائے دہی کے استعمال کے لیے بیلٹ کے حصول کے لیے 22 جنوری تک اپنی درخواست جمع کرائیں۔
درخواست فارم کمیشن کی ویب سائٹ سے ڈائون لوڈ کیے جا سکتے ہیں۔ جن ووٹرزکو پوسٹل بیلٹ جاری کیے جائیں گے وہ اپنے پولنگ سٹیشن پر ووٹ دینے کے اہل نہیں ہوں گے۔ ایسے ووٹروں کو ہدایت کی گئی ہے کہ وہ اپنی درخواست آفس یا محکمہ کےذریعے بھجوائیں۔
