اٹلی کے کھانے دنیا بھر میں مشہور ہیں اور ان کھانوں سے متعلق ان کے کچھ اصول بھی ہیں۔ اطالوی لوگ اس معاملے میں شدت پسند ہیں اور سختی سے ان اصولوں پر کاربند رہتے ہیں۔
اٹلی کے کھانوں میں پیزا کو ایک خاص مقام حاصل ہے۔ حال ہی میں پیزا بنانے والے معروف اور ماہر شیف جینو سوربیلو نے ملک میں پہلی بار پائن ایپل پیزا متعارف کرایا تو انہیں شدید عوامی رد عمل کا سامنا کرنا پڑا۔
پائن ایپل پیزا آخر ہے کیا؟
جینو سوربیلو کا کہنا ہے کہ انہوں نے کھانوں سے متعلق امتیازی برتاؤ کے خلاف ’پائن ایپل پیزا‘ تخلیق کیا ہے جس میں انہوں نے ٹماٹر کی چٹنی کی تہہ کو ختم کرکے 3 مختلف اقسام کی چیز استعمال کی ہے جبکہ انناس کے ٹکڑوں کو 2 مرتبہ پکا کر پیزا میں ایسے استعمال کیا ہے جیسے وہ کیرامل کی طرح کوئی شے ہو۔
لوگ کیوں تنقید کر رہے ہیں؟
جینو سوربینو نے کہا کہ انہوں نے پیزا سوشل میڈیا پا لانچ کیا لیکن انہیں افسوس ہے کہ لوگوں نے پیزا کو ٹیسٹ کیے بغیر رائے قائم کی اور سوشل میڈیا پر انہیں شدید تنقید کا نشانہ بنایا۔ تاہم اٹلی کے لوگوں کا کہنا ہے کہ یہ پیزا مزیدار ہے یا نہیں، مسئلہ یہ نہیں بلکہ پیزا پر پائن ایپل ڈالنا ایک ناپسندیدہ عمل ہے۔
جینو سوربینو نے کہا ہے کہ سوشل میڈیا پر لانچ کرنے سے پہلے انہوں نے خاموشی سے پائن ایپل پیزا کو اپنے مینیو میں شامل کیا تھا اور اسے بہت سے صارفین نے پسند بھی کیا تھا۔ میڈیا رپورٹس کے مطابق کئی لوگوں نے پائن ایپل پیزا ٹرائی کیا ہے، کچھ لوگوں نے اگر اسے پسند کیا ہے تو بہت سے ایسے بھی ہیں جنہوں نے اسے سخت ناپسند کیا ہے۔ جبکہ پورے ملک میں اس وقت یہی بحث چل رہی ہے کہ پائن ایپل پیزا مزیدار ہے یا نہیں۔
