سابق وزیر خزانہ اسحاق ڈار نے کہا ہے کہ عام طور پر یہ کہا جاتا ہے کہ وفاق میں وزیراعظم بننے سے بہتر ہے کسی بڑے صوبے کا وزیراعلی بن جائیں کیوں کہ صوبوں کے پاس وسائل زیادہ آگئے ہیں۔
ایوان بالا (سینیٹ) میں اظہار خیال کرتے ہوئے سابق وزیر خزانہ اسحاق ڈار نے سینیٹ میں تمام صوبوں کی نمائندگی ہے، سینیٹرز کو صرف سوال جواب کے سیشن تک محدود نہیں رہنا چاہیے، صوبے اس بات پر غور کریں کہ تعلیم و صحت کے شعبے میں کیسے بہتری لائی جائے اور ان دو شعبوں کے لیے مختص رقم میں اضافہ کیا جائے۔
اسحاق ڈار نے کہا کہ آج صوبوں کے وسائل میں اس قدراضافہ ہوچکا ہے کہ کہا جاتا ہے، وفاق میں وزیراعظم ہونے سے بہتر ہے کہ کسی صوبے کے وزیراعلی بن جائیں، ایسا اس لیے ہے کہ زیادہ وسائل صوبوں کے پاس چلے گئے ہیں۔
انہوں نے کہا کہ صوبے وفاق کے ساتھ مل کر طے کریں کہ صحت اور تعلیم پر کتنا خرچ کرنا ہے، سینیٹرز اپنی اپنی پارلیمانی پارٹی کو مجبور کریں کہ وہ صوبوں کو اس بات پر قائل کریں کہ تمام صوبے تعلیم اور صحت پر کم از کم اتنی رقم خرچ کریں۔
