آئین کی بالادستی اور سیاسی استحکام کے لیے تا حیات نا اہلی کیخلاف فیصلہ ناگزیر تھا، قانونی ماہرین

قانونی ماہرین نے تا حیات نا اہلی کیس کے سپریم کورٹ آف پاکستان کے فیصلے کو درست اور بروقت قرار دیتے ہوئے کہا ہے کہ ملک میں آئین کی بالادستی اور سیاسی استحکام کے لیے ایسا ہی فیصلہ آنا ضروری تھا۔ آئین میں کہیں بھی تا حیات نااہلی کی شق موجود نہیں، سپریم کورٹ نے فیصلہ دے کر آئین اور پارلیمنٹ کی بالادستی کو برقرار رکھا ہے۔

سپریم کورٹ کا فیصلہ تاریخی ہے، اعظم نذیر تارڑ

انہوں نے کہا کہ یہ ایک عجیب بات تھی کہ ایک قاتل یا ریپ کیس میں ملوث شخص 5 سال کی سزا کے بعد الیکشن لڑ سکتا تھا لیکن اپنے اثاثے چھپانے کے بے بنیاد الزام پر ایک شخص کو تا حیات نا اہل قرار دینا سمجھ سے ہی بالا تر تھا۔ سپریم کورٹ کا آف پاکستان کا فیصلہ آئین اور قانون کے عین مطابق ہے اور تاریخی ہے۔

ان کا کہنا تھا کہ سپریم کورٹ کا یہ فیصلہ بروقت ہے کیوں کہ تا حیات نا اہلی کی وجہ سے آر اوز کو بھی فیصلوں میں بہت مشکلات پیش آ رہی تھیں۔ سپریم کورٹ نے یہ فیصلہ دے کر ایک دھبا صاف کیا ہے۔

صادق اور امین کی شق کی درست تشریح ہو گئی ہے

ایک سوال کے جواب میں انہوں نے کہا کہ سپریم کورٹ نے کوئی آئین تبدیل نہیں کیا بلکہ انہوں نے تو سمیع اللہ بلوچ فیصلے کی تشریح کرتے ہوئے اسے کالعدم قرار دیا ہے۔ اس فیصلے سے الیکشن کمیشن کے کاغذات نامزدگی منظور یا مسترد کرنے کے فیصلوں پر کوئی اثر نہیں پڑے گا کیوں کہ ایک اُمیدوار کے کرکٹر کو آئین کے مطابق جن قواعد و ضوابط پر نا اہل قرار دیا جا سکتا ہے وہ الیکشن کمیشن کے قوانین میں برقرار ہیں۔ سپریم کورٹ آف پاکستان نے صادق اور امین والی شق کی بھی درستی اور تشریح کی ہے۔

This part of order far more fundamental than simply holding disqualification is not for life.

Until parliament frames law specifying which court will declare someone non-sadiq & non-amin & procedure for doing that, 62 (1) (f) to simply be considered as guideline for VOTERS 👏👏 pic.twitter.com/vgT5hSaNf1

— Salahuddin Ahmed (@SalAhmedPK) January 8, 2024

اعظم نذیر تارڑ نے ایک سوال کے جواب میں کہا کہ ابھی تک تفصیلی فیصلہ آئے گا تو اس سے معلوم ہو گا کہ سپریم کورٹ نے پارلیمنٹ کی قانون سازی کی کن بنیادوں پر تشریح کی ہے۔ سپریم کورٹ نے آئین کے مطابق اپنا فیصلہ دے دیا ہے۔

آرٹیکل 62 کی تشریح نہ ہوتی تو سیاسی عدم استحکام کا اندیشہ برقرار رہتا

سپریم کورٹ آف پاکستان اگر آرٹیکل 62 ون ایف کے تحت تاحیات نااہلی کی تشریح نہ کرتی تو پھر آئندہ یہ تلوار سر پر لٹکتی رہتی، اب صادق اور امین کے حوالے سے تشریح بھی ہو گئی ہے اور عدالت کے ایک جج کے فیصلے کی بھی درست تشریح ہو گئی ہے۔ اگر نواز شریف کل کو وزیر اعظم بنتے تو ملک میں اس فیصلے کی وجہ سے عدم استحکام کا اندیشہ برقرار رہتا۔اس فیصلے کو کالعدم قرار دینے کا یہی اصل وقت تھا۔

سپریم کورٹ کا فیصلہ سو فیصد درست اور بروقت ہے، احمد بلال محبوب

ماہر قانون اور سربراہ پلڈاٹ احمد بلال محبوب نے کہا کہ سپریم کورٹ نے بروقت فیصلہ سنایا ہے جس سے الیکشن کے انعقاد میں بھی آسانیاں پیدا ہو گئی ہیں کیوں کہ آراوز نے بھی اس کی وجہ سے کئی فیصلے روک رکھے تھے کہ ہم کس کو اہل یا نا اہل قرار دیں۔

انہوں نے کہا کہ سپریم کورٹ کے اس فیصلے کے بعد آر اوز اور ٹربیونلز کے لیے بھی آسانیاں پیدا ہو گئی ہیں، سمیع اللہ بلوچ کا نااہلی فیصلہ قومی انصاف کے بھی خلاف تھا، جب آئین نے کسی کی نا اہلی کی مدت کا تعین نہیں کیا ہوا تو آپ کیسے اس کی نا اہلی کی مدت کو طے کر سکتے ہیں، یہ تو آئین کو دوبارہ لکھنے والی بات تھی۔ اس لیے اس فیصلے کو کالعدم قرار دیا جانا سو فیصد درست اور انصاف پر مبنی ہے، اس بات سے قطع نظر کہ اس سے کس کو فائدہ پہنچتا ہے یا نقصان، آئین کے مطابق یہ بالکل درست فیصلہ ہے۔

احمد بلال محبوب نے کہا کہ سپریم کورٹ آف پاکستان کے اس فیصلے سے پارلیمنٹ کی بالادستی بھی برقرار رہی ہے اور آئین کی بھی درست تشریح ہوئی ہے اس لیے اب الیکشن کی شفافیت پر بھی اس قانون کے حوالے سے کوئی آنچ نہیں آئے گی۔

اگر کسی غلط تشریح کے تحت کوئی پارلیمنٹ وجود میں آتی تو آئندہ بھی ملک میں سیاسی عدم استحکام برقرار رہتا اس لیے یہ انتہائی عمدہ اور بروقت فیصلہ ہے۔

سپریم کورٹ نے برسوں بعد ملک کو پہنچنے والے نقصان کی تلافی کی، عرفان قادر

سابق ارٹارنی جنرل عرفان قادر نے کہا کہ تا حیات نا اہلی آئینی طور پر درست نہیں تھی، آج سپریم کورٹ نے برسوں بعد ملک کو پہنچنے والے نقصان کی تلافی ہے۔

اٹارنی جنرل نے تا حیات نا اہلی کیس سے متعلق فیصلے پر ردعمل دیتے ہوئے کہا کہ سپریم کورٹ 184 تھری، ہائیکورٹ199 کے تحت آرٹیکل 62 ون ایف کی ڈکلیئریشن نہیں دے سکتیں۔ انہو ں نے کہا کہ قانون میں درج نہیں ہے کہ کون سی عدالت آرٹیکل 62 ون ایف کے تحت ڈکلیئریشن دے سکتی ہے۔