پیپلزپارٹی اقتدار میں آکر بلوچستان کے تمام مسائل حل کرے گی، آصف زرداری

پاکستان پیپلز پارٹی پارلیمنٹیرینز (پی پی پی پی) کے صدر اور سابق صدرِ مملکت آصف علی زرداری نے اس عزم کا اعادہ کیا ہے کہ آئندہ عام انتخابات کے بعد آنے والی عوامی حکومت بلوچستان کے عوام کو درپیش مسائل کے حل کے ساتھ ساتھ ان کی ترقی و بہبود پر توجہ دے گی۔

سابق صدر مملکت آصف زرداری نے ڈیرہ بگٹی میں ہونے والے جلسے سے ٹیلیفونک خطاب کیا ہے۔

انہوں نے کہاکہ پاکستان پیپلزپارٹی نے جو بھی وعدہ کیا وہ پورا کرکے دکھایا ہے۔

سابق صدر مملکت نے کہاکہ پاکستان پیپلز پارٹی بلوچستان کے مسائل کو سمجھتی ہے۔ یہاں کے اسپتالوں کا مسئلہ ہو یا گیس کا تمام مسائل حل کریں گے۔

آصف علی زرداری نے کہاکہ آنے والی پیپلزپارٹی حکومت ایسے اقدام اٹھائے گی جس سے بلوچستان کے عوام کو روزگار اور آمدنی کے مواقع میسر آئیں گے۔

بلوچستان میں پیپلزپارٹی کی حکومت بنے گی، سرفراز بگٹی

اس موقع پر جلسہ سے خطاب کرتے ہوئے سابق نگراں وفاقی وزیر داخلہ و پی پی پی رہنما سرفراز بگٹی نے کہا کہ پاکستان پیپلزپارٹی آئندہ عام انتخابات میں واضح اکثریت حاصل کرکے بلوچستان میں حکومت بنائے گی۔

انہوں نے کہاکہ پاکستان پیپلز پیپلزپارٹی نے ہمیشہ غریبوں اور کسانوں کی بات کی، شہدا کی وارث جماعت پاکستان پیپلزپارٹی ہی ہے۔

انہوں نے کہاکہ شہدا کے ورثا کبھی نہ سمجھیں کہ وہ تنہا ہوگئے ہیں، کیونکہ چیئرمین بلاول بھٹو زرداری اور صدر آصف علی زرداری شہدا کے لواحقین کے وارث ہیں۔