پی ٹی آئی رہنما شیر افضل مروت نے وی نیوز سے خصوصی بات چیت میں کہا ہے کہ کراچی کا دورہ کامیابی سے جاری ہے، ہمارا انتخابی نشان چھین کر عجیب و غریب نشانات دیے جا رہے ہیں تاکہ ووٹرز کو کنفیوژ کرکے جتنا نقصان ہوسکے پہنچایا جاسکے۔
بلے کا نشان نہ ملنے کا بہت نقصان ہوگا
شیر افضل مروت کا کہنا تھا کہ بلے کا انتخابی نشان نہ ملنے کی وجہ سے ووٹوں کی صورت میں بہت زیادہ نقصان ہو جائے گا، کیوںکہ پی ٹی آئی کے ووٹرز بلے کے نشان کا ساتھ ذہنی طور پر ہم آہنگ ہیں لیکن تعلیم بڑھ چکی ہے اور ہماری کوشش رہے گی کہ اس نقصان کو کم سے کم کیا جا سکے۔
عارف علوی کے بیٹے نہیں خرم شیر زمان کو ٹکٹ ملا ہے
صدر عارف علوی کے بیٹے اواب علوی کے حوالے سے انکا کہنا تھا کہ ان کو تو ہم نے ٹکٹ نہیں دیا ہے۔ ’مجھے اس بات کا علم نہیں کہ عارف علوی کے بیٹے کو ٹکٹ دیا گیا ہے، وہاں پر تو خرم شیر زمان کو ٹکٹ دیا گیا ہے۔‘
عوام تو ہمیں ووٹ دیں گے اب دیکھنا ہے کہ دھاندلی کیسے کرتے ہیں؟
شیر افضل پر امید ہیں کہ ان کی جماعت کو آئندہ عام انتخابات میں ووٹ ملیں گا، عوام تو ہمیں ووٹ دیں کہ اب دیکھتے ہیں کہ یہ لوگ کس طرح ووٹ چوری کرتے ہیں۔ ’9 مئی کا ڈھکوسلا بنا کر 6 ماہ سے یہ ووٹ چوری کرنے میں لگے ہوئے ہیں اور ہمیں یقین ہے کہ پی ٹی آئی کے لوگ اور ایجنٹس اپنا ووٹ محفوظ کرسکے تو پھر مرکز و صوبوں میں ہماری حکومت بنے گی۔‘
کراچی میں امیدواروں سے مایوسی کیوں؟
شیر افضل مروت کا کہنا تھا کہ وہ کراچی امیدواروں کے لیے آئے تھے کیونکہ امیدواروں کی صورت حال سندھ میں بھی وہی ہے درجنوں مقدمات بنائے گئے ہیں، تحریک انصاف کے امیدواروں پر بہت سے امیدواروں کے سنجیدہ سوالات تھے جن کا انہیں بعد میں بتایا گیا لیکن بہت سارے ایسے بھی ہیں جو مقدمات کا بہانہ بنا کر نہیں آئے جس پر انہیں کافی مایوسی ہوئی ہے۔
پی ٹی آئی کے ووٹر کو مشورہ
شیر افضل مروت کا کہنا تھا کہ نہ صرف کراچی بلکہ پورا سندھ پاکستان تحریک انصاف کے ساتھ کھڑا ہے، بس محنت کی ضرورت ہے، انہوں نے پی ٹی آئی کے ووٹرز کو مشورہ دیا ہے کہ ضد نہیں ہوتی کہیں پر سوچنا بھی پڑتا ہے، بلے کا نشان اگر نہیں ملا تو اسی نشان پر مہر لگائیں جو پاکستان تحریک انصاف کے امید واروں کو الاٹ کیے گئے ہیں۔
