پشاور ہائیکورٹ میں دہشتگردوں کی دوبارہ آبادکاری کے خلاف اے این پی کے صوبائی صدر ایمل ولی کی درخواست پر سماعت ہوئی ہے۔
پشاور ہائیکورٹ کے جج جسٹس صاحبزادہ اسداللہ اور جسٹس اعجاز خان نے ایمل ولی کی درخواست پر سماعت کی۔
جسٹس صاحبزادہ اسداللہ نے ریمارکس دیے کہ اب تو حالات تبدیل ہو گئے ہیں۔ جس پر درخواست گزار کے وکیل بابر خان ایڈووکیٹ نے کہاکہ ہم جوڈیشل انکوائری چاہ رہے ہیں۔ فریقین کو نوٹسز جاری کر کے جواب طلب کیا جائے۔
جسٹس اعجاز خان نے ریمارکس دیے کہ جوڈیشل کمیشن بنانا تو صوبائی حکومت کا اختیار ہے۔
جسٹس صاحبزادہ اسداللہ نے کہاکہ اب صورتحال تبدیل ہوچکی ہے لیکن پھر بھی آپ کو سنیں گے۔
بعدازاں عدالت نے وفاقی اور صوبائی حکومتوں کو نوٹسز جاری کرتے ہوئے جواب طلب کرلیا۔
