وزیر خارجہ بلاول بھٹو زرداری نے کہا ہے کہ پاکستان کو معاشی طور پر مسائل ہیں، ملک عوام کی مدد سے ان مسائل سے نکل جائے گا۔
نیویارک میں صحافیوں سے گفتگو کرتے ہوئے وزیر خارجہ بلاول بھٹو زرداری نے کہا کہ ملک اس وقت مسائل میں ہے، مسائل دنیا بھر کے ممالک کو ہیں،اب دیکھنا یہ ہے کہ پاکستان کے عوام ان مسائل کا مقابلہ کیسے کرتے ہیں۔ہم ماضی میں بھی مشکل وقت سے گزرے ہیں اور مقابلہ کرکے ان مشکل حالات سے نکلے ہیں اور اب بھی عوام کی مدد سے اس مشکل دور سے نکلیں گے۔
بلاول بھٹو زرداری نے کہا کہ او آئی سی کے پلیٹ فارم سے کونسل آف منسٹری کی طرف سے پاکستان ایک سمینار کی میزبانی کر رہا ہے جس میں ’عورت اسلام میں‘ میں پر بات کر رہے ہیں، پوری دنیا میں یہ تاثر ہے کہ اسلام میں عورتوں کے حقوق غصب کیے جاتے ہیں مگر حقیقت یہ ہے کہ اسلام وہ دین ہے جس نے عورتوں کو سب سے پہلے حقوق دیے۔
وزیر خارجہ نے کہا کہ اقوام متحدہ کی جنرل اسمبلی کے صدر کے ساتھ پاکستان اسلام فوبیا پر ایک کانفرنس کی مزبانی کر رہا ہے، کانفرنس میں اسلام کے بارے میں پروپیگنڈے اور مسلم اقلیتیوں کے بارے میں جو انداز اپنایا جاتا ہے اس پر روشنی ڈالنے کی کوشش کریں گے۔
بلاول بھٹو زرداری نے کہا کہ پاکستان پیپلز پارٹی کے ساتھ خواتین کی ایک کثیر تعداد ہے جو پیپلز پارٹی کو سپورٹ بھی کرتی ہیں اور ووٹ بھی کرتی ہیں۔ ہم چاہتے ہیں، سیاست، معیشت اور دیگر شعبوں میں خواتین کا کردار ہو، خواتین کو پاور دیں گے تو ملک ترقی کرے گا۔
واضح رہے کہ اسلام میں خواتین کانفرنس آج پاکستان کی سربراہی میں اقوام متحدہ کے صدر دفتر میں اقتصادی اور سماجی کونسل کے چیمبر میں ہو رہی ہے۔ وزیر خارجہ بلاول بھٹو زرداری اس کانفرنس میں شرکت کریں گے۔
پاکستان کی طرف سے بلائی گئی کانفرنس کا مقصد اسلام میں خواتین کے حقوق کے بارے میں عام تصور اور حقیقت کے درمیان فرق کو ختم کرنا اور مشہور مسلم خواتین کے کارناموں کے بارے میں بتانا ہے۔ اس کا مقصد او آئی سی ممالک میں خواتین کے کردار کو وسعت دینے کے مواقع تلاش کرنا ہے۔
اقوام متحدہ کی جنرل اسمبلی کی تاریخی قرارداد 76/254 کی پیروی میں 15 مارچ کو اسلامو فوبیا سے نمٹنے کے لیے بین الاقوامی دن کے طور پر طے کیا گیا ، جنرل اسمبلی کے صدر اور وزیر خارجہ بلاول بھٹو زرداری 10 مارچ کو اس دن کے موقع پر ایک خصوصی اعلیٰ سطح تقریب کا مشترکہ انعقاد کریں گے۔
