پیپلزپارٹی اقتدار میں آکر نفرت اور تقسیم کی سیاست کو دفن کرے گی، بلاول بھٹو

پاکستان پیپلزپارٹی (پی پی پی) کے چیئرمین بلاول بھٹو نے کہا ہے کہ ہم اقتدار میں آکر نفرت اور تقسیم کی سیاست کو دفن کر دیں گے، ملک کے مسائل کا حل صرف پیپلزپارٹی کے پاس ہی ہے۔

لاہور میں جلسہ عام سے خطاب کرتے ہوئے بلاول بھٹو نے کہاکہ کوئی اور اگر اپنے نظریہ سے ہٹتا ہے تو ہٹ جائے مگر ہم اپنا نظریہ نہیں چھوڑ سکتے۔

چیئرمین پی پی پی نے کہاکہ پیپلزپارٹی ملک کو معاشی اور جمہوری بحران سے نکالے گی، اس کے علاوہ دہشتگردوں کا بھی سر کچل دیں گے۔

اشرافیہ کی سبسڈی بند کی جائے گی

انہوں نے کہاکہ مجھے موقع ملا تو 17 وزارتیں بند کرکے سالانہ 300 ارب روپے غریبوں پر خرچ کروں گا، اس کے علاوہ اشرافیہ کو ملنے والی سالانہ 1500 ارب روپے کی سبسڈی بھی ختم کی جائے گی۔

بلاول بھٹو نے کہاکہ جو لوگ میرے لاہور سے الیکشن لڑنے پر سوال اٹھاتے ہیں ان کے لیے پیغام ہے کہ لاہور میرا ہے، یہاں کے عوام نے قائد عوام ذوالفقار بھٹو شہید کی موت پر خود کو آگ لگا کر احتجاج کیا، اس کے علاوہ بینظیر بھٹو شہید کا تاریخی استقبال کیا گیا۔

انہوں نے کہاکہ پنجاب کے عوام پر کبھی شوباز تو کبھی وسیم اکرم پلس مسلط کیا جاتا ہے، اب ہم پاکستان کو ان پرانے سیاستدانوں کے حوالے نہیں کر سکتے۔

بلاول بھٹو نے کہاکہ مجھے موقع ملا تو آمدنی دُگنی کر کے دکھاؤں گا، اس کے علاوہ قائدعوام کا مکان دینے کا وعدہ پورا کروں گا۔

ملک بھر میں 30 لاکھ گھر بنائیں گے

چیئرمین پی پی پی نے کہاکہ میں اقتدار میں آکر پورے ملک میں 30 لاکھ گھر بنا کر غریبوں میں تقسیم کروں گا اور اس کے مالکانہ حقوق خواتین کو دیے جائیں گے۔

انہوں نے کہاکہ ہماری حکومت بنے گی تو بی آئی ایس پی کی رقم بڑھائیں گے، اس کے علاوہ کسان اور مزدور کارڈ بھی دیے جائیں گے۔

ان کا کہنا تھا کہ ہم اپنے نوجوانوں کو یوتھ کارڈ دیں گے تاکہ روزگار ملنے تک انہیں وظیفہ ملتا رہے۔ اس کے علاوہ تعلیم اور صحت کے مسائل بھی حل کیے جائیں گے۔

بلاول بھٹو نے کہاکہ آج ہمارے جلسے میں چوہدری سرور اور اعتزاز احسن بھی موجود ہیں، ہماری سوچ میں اختلاف ہو سکتا ہے مگر ملک کی خاطر سب کو ساتھ لے کر چلنا ہوگا۔