شیر پر مہر لگائیں تاکہ ملک سے غربت اور مہنگائی کا خاتمہ ہوسکے، شہبازشریف

رہنما مسلم لیگ ن شہباز شریف نے کہا ہے کہ 8 فروری کو شیر کو کامیاب کرائیں، شیر پر مہر لگائیں تاکہ ملک سے غربت اور مہنگائی کا خاتمہ ہوسکے۔

شہبازشریف نے مانسہرہ میں مسلم لیگ ن کے ایک بڑے جلسہ عام سے خطاب کرتے ہوئے کہا کہ ہماری چلتی ہوئی حکومت کو گھر بھیجا گیا، ہماری حکومت کے خلاف بے بنیاد الزامات لگائے گئے۔ نواز شریف نے اپنے دور میں ملک کو ترقی کی راہ پر گامزن کیا۔

شہبازشریف کا کہنا تھا کہ پی ٹی آئی حکومت نے ملک کو تباہی کے دہانے پر پہنچایا، ہماری حکومت رہتی تو ملک میں اندھیروں کا خاتمہ ہوچکا ہوتا، پانی کی وہ بات کرتے ہیں جن کے اپنے صوبے میں پانی نہیں ملتا، نواز شریف تھا تو مفت ادویات بھی ملتی تھیں جو بند کر دی گئیں۔ اگر آپ نے نواز شریف کو دوبارہ وزیر اعظم بنایا تو آپ کے تمام مسائل حل کریں گے۔