مسلم لیگ کی رہنما مریم نواز نے کہا ہے کہ نواز شریف صاحب مانسہرہ والوں نے آج اپنا فیصلہ سنا دیا ہے،8 فروری کو شیر پر مہر لگا کر کامیاب کرائیں تاکہ ملک خوشحالی کی طرف گامزن ہو، مانسہرہ والے نوازشریف سےبے حد محبت کرتے ہیں۔
مریم نواز نے مانسہرہ میں مسلم لیگ ن کے ایک بڑے جلسہ عام سے خطاب کرتے ہوئے کہا کہ نواز شریف نے 10 سال بعد مانسہرہ سے الیکشن لڑنے کافیصلہ کیا ہے، کیپٹن صفدر نے آپ کی خدمت میں دن رات ایک کیا، مانسہرہ والوں سے جھوٹ بولاگیا، جنہوں نے لوگوں سے نوکریوں کا وعدہ کیا وہ کدھر ہیں؟ پچھلی حکومت نے خیبر پختونخوا میں تباہی کے سوا کچھ نہیں کیا۔
مزید پڑھیں
مریم نواز کا کہنا تھا کہ کوئی ایک اورنج لائن خیبرپختونخوا میں دکھا دو جو آپ نے بنائی ہو، جو مخالفت کرتے تھے ان کوخیبر پختونخوا میں جنگلا بس بنانا پڑی، جو تنقید کرتے ہیں ان کی کارکردگی صفر ہے، یہاں پر نوازشریف کے بدترین مخالف کی حکومت تھی۔
ان کا کہنا تھا کہ مخالفت کے باوجود ہم نے ترقی کا سفر یہاں رکنے نہیں دیا، اچھے سکول ،کالجز، یونیورسٹیاں آپ کا حق بھی ہے، مانسہرہ والو مستقبل کا سوچ سمجھ کر فیصلہ کرنا۔
