مریم اورنگزیب اور جاوید لطیف اہم کیس میں بری

لاہور کی انسداد دہشتگردی عدالت نے مسلم لیگ ن کی ترجمان مریم اورنگزیب اور سینیئر رہنما جاوید لطیف کو اشتعال انگیز گفتگو کے مقدمے میں بری کر دیا ہے۔

انسداد دہشتگردی عدالت لاہور کے جج نوید اقبال نے فیصلہ سناتے ہوئے ایم ڈی پی ٹی وی سہیل علی خان، سابق ڈائریکٹر نیوز راشد بیگ کو بھی مقدمے سے بری کر دیا ہے۔

عدالت نے مریم اورنگزیب سمیت دیگر کی بریت کی درخواستوں پر محفوظ فیصلہ سنا دیا۔

واضح رہے کہ اس سے قبل وکلا نے مریم اورنگزیب سمیت دیگر ملزمان کی بریت کی درخواستوں پر دلائل مکمل کیے تھے۔

ملزمان کے وکیل نے کہاکہ مقدمہ 5 روز کی تاخیر سے درج کیا گیا۔ مقدمے میں بتایا گیا کہ ٹی وی پر اشتعال انگیز گفتگو ہوئی مگر ٹی وی چینل کا نام نہیں بتایا گیا۔

وکیل کا مزید کہنا تھا کہ مقدمہ درج کرتے وقت قانونی تقاضوں کا درست جائزہ نہیں لیا گیا۔ مدعی اپنے بیان سے منحرف ہو چکا ہے اور کوئی گواہ نہیں ہے۔