اسلام آباد ہائیکورٹ نے ڈپٹی کمشنر اسلام آباد کے ایم پی او جاری کرنے کا اختیار بحال کر دیا، عدالت نے حکم امتناع کی درخواست پر ڈی سی اسلام آباد کا اختیارعارضی طور پر بحال کیا۔ چیف جسٹس اسلام آباد ہائیکورٹ جسٹس عامر فاروق اور جسٹس طارق محمود جہانگیری نے احکامات جاری کیے۔
اسلام آباد ہائیکورٹ میں ڈپٹی کمشنر اسلام آباد کے ایم پی او جاری کرنے کے اختیار کو بحال کرنے کے حوالے سے چیف جسٹس عامرفاروق کی سربراہی میں دو رکنی بینچ نے سماعت کی، کارروائی مکمل ہونے پر عدالت نے عارضی طور پر ڈپٹی کمشنر کے اختیار کو بحال کردیا۔ سنگل بنچ کے فیصلے کے خلاف چیف کمشنر و دیگر کی اپیل پر فریقین کو نوٹس بھی جاری کر دیے گئے۔
مزید پڑھیں
اس سے قبل سنگل بینچ جسٹس بابر ستار نے ڈی سی اسلام آباد کا ایم پی او جاری کرنے کا اختیار غیر قانونی قرار دیا تھا، سنگل بینچ کے فیصلے کے خلاف چیف کمشنر، سیکرٹری داخلہ نے انٹرا کورٹ اپیل دائر کر رکھی ہے۔
واضح رہے ڈپٹی کمشنر اسلام آباد نے مختلف سیاسی رہنماؤں کے تھری ایم پی او جاری کیے، جس کی بدولت پولیس نے انہیں گرفتار کیا بعد ازاں عدالت نے ڈپٹی کمشنر کے اس اختیار کو غیر قانونی قرار دے دیا تھا، جس پر اسلام آباد ہائیکورٹ نے ڈپٹی کمشنر کے اس اختیار کو دوبارہ بحال کردیا ہے۔