اسلام آباد ہائیکورٹ نے ڈپٹی کمشنر اسلام آباد اور ایس ایس پی آپریشنز سمیت دیگر کے خلاف توہین عدالت کیس میں گزشتہ برس مئی سے ستمبر تک جاری کیے گئے تمام ایم پی او آرڈرز کا مکمل ریکارڈ 14 فروری تک طلب کر لیا ہے۔
اسلام آباد ہائیکورٹ کے جسٹس بابر ستار نے پاکستان تحریک انصاف کے رہنما شہریار آفریدی کو عدالتی احکامات کے خلاف گرفتار کرنے کے لیے دوبارہ ایم پی او آرڈر جاری کرنے پر توہین عدالت کیس کی سماعت کی۔ ڈی سی اسلام آباد عرفان نواز میمن، ایس ایس پی آپریشنز اور دیگر عدالت کے روبرو پیش ہوئے، اسلام آباد کے 3 تھانوں کے ریکارڈ کیپرز نے ریکارڈ پیش کیا اور بیانات قلمبند کرائے۔
دوران سماعت پولیس اسٹیشن مارگلہ کے محرر طارق عزیز خان نے بتایا کہ انہوں نے 16 مئی 2023 کی رپورٹ مرتب کی۔ آبپارہ تھانے کے ریکارڈ کیپر اختر زیب نے بیان دیا کہ 22 اگست 2022 کو درج ایف آئی آر کی مصدقہ کاپی عدالت کے سامنے پیش کی ہے۔ تھانہ انڈسٹریل ایریا کے ریکارڈ کیپر نے بھی ایف آئی آر کی مصدقہ کاپی عدالت کے سامنے پیش کی۔
مزید پڑھیں
ایس پی فاروق بٹر کے وکیل نے ریکارڈ نہ ملنے کا اعتراض کیا جس پر عدالت نے کہا کہ ہمیں بھی ریکارڈ آج ملا ہے، آپ کو بھی مل جائے گا۔
ڈپٹی کمشنر آفس کے ریکارڈ کیپر علی محمد نے ایم پی او آرڈرز کا ریکارڈ پیش کیا، عدالت نے کہا ڈپٹی کمشنر نے جتنے ایم پی او آرڈر جاری کیے یا واپس لیے ہیں، ان سب ریکارڈ بیان حلفی کے ساتھ جمع کرائیں ۔
وکیل نے کہا ہم ریکارڈ کیپرز پر جرح کرنا چاہتے ہیں۔ عدالت نے استدعا مسترد کرتے ہوئے کہا کہ ریکارڈ کیپر نے یہ آرڈر جاری نہیں کیے، ان پر آپ جرح نہیں کر سکتے، ڈی سی نے آرڈر جاری کیے آپ ان پر جرح کر لینا۔ وہ بھی جواب نہ دینا چاہیں تو ان کی مرضی ہے۔
جسٹس بابر ستار نے ریمارکس دیے پہلے بات سمجھ لیں کہ ’ کیس عدالت کو سکینڈلائز کرنے کا نہیں ہے، یہ توہین عدالت کا کیس انصاف کی فراہمی میں رکاوٹ کا ہے۔ میں نے 50 سالہ کیس لاء دیکھا ہے ایسے 2 سے 3 کیسز ہی ملے ہیں۔ توہین عدالت کے اکثر کیسز عدالت کو سکینڈلائز کرنے سے متعلق ہیں‘۔
جسٹس بابر ستار نے ریمارکس دیے کہ ’اس عدالت کے یہاں بیٹھنے کا ایک مقصد ہے، مجھے اس بات سے غرض ہے کہ انصاف ہونا چاہیے‘۔
