اسلام آباد کے پمز اسپتال کی لیڈی ڈاکٹر نے 22 سالہ کشمیری نوجوان کو مبینہ طور پر اغوا کر لیا۔ 10 جنوری کو پیش آئے اس واقعے کے عینی شاہدین کے مطابق لیڈی ڈاکٹر نے نیلم ویلی کے رہائشی محمد بلال سے اسپتال کے اندر تقریباً آدھا گھنٹہ بات چیت کی۔ اس کے بعد وہ بلال کو لے کر ٹیکسی میں سوار ہوئی اور اسپتال سے نکل گئی۔
اغوا کے اس واقعے کی ایف آئی آر بدھ کے روز تھانہ کراچی کمپنی میں درج ہوئی جس کے مطابق بلال کے ہمراہ اس کا کزن رضوان الرحمٰن بھی تھا۔ اس نے اسلام آباد پولیس کو بتایا کہ وہ لوگ پمز اسپتال میں دوائی لینے آئے تھے اور لیڈی ڈاکٹر کے ساتھ جاتے وقت بلال نے انہیں کہا کہ وہ ناشتہ کرلیں، وہ شام تک واپس آ جائے گا۔ رضوان اور باقی ساتھی شام تک انتظار کرتے رہے مگر بلال واپس نہ آیا جبکہ اس کے تینوں فون نمبر بھی بند تھے۔
ایف آئی آر میں درج ہے کہ لیڈی ڈاکٹر نے نیلے رنگ کی وردی، ڈاکٹرز والا سفید کوٹ، اور کالے جوتے پہن رکھے تھے جبکہ ہسپتال میں ملاقات سے پہلے اس کی بلال سےفون پر بھی بات ہوئی تھی۔
بلال کے والد محمد نذیر نے وی نیوز سے بات کرتے ہوئے بتایا کہ ایف آئی آر میں جس رضوان کا ذکر ہوا ہے وہ بلال کا کزن نہیں ہے بلکہ یہی وہ شخص ہے جس نے بلال کو فون کر کہ گھر سے بلایا تھا کہ آؤ کام پر چلیں۔
ان کا کہنا تھا کہ بلال چائنہ کی کسی کمپنی میں فور مین تھا اور بالاکوٹ میں کام کرتا تھا۔ رضوان نے اسی دن اس کمپنی میں ملازمت اختیار کی تھی جس دن بلال کو فون کر کے بلایا۔
بلال چلہانہ، ضلع نیلم ویلی میں واقع اپنے گھر میں موجود تھا اور اس کے گھر والوں نے یہی سمجھا کہ اسے مظفر آباد کے ساتھی بالاکوٹ کام پر جانے کو بلا رہے ہیں۔
بلال کے والد نے مزید بتایا، ’ہم نہیں جانتے کہ بلال اور اس کے ساتھی بالاکوٹ کام پر جانے کے بجائے اسلام آباد کیسے پہنچ گئے اور وہ ڈاکٹر کون تھی جو بلال کو اغوا کرکے لے گئی‘۔
وی نیوز کے استفسار پر کیس کے تفتیشی آفیسر محمد وسیم عباسی نے بتایا کہ پولیس نے سی سی ٹی وی کی فوٹیج دیکھی ہے جس سے ظاہر ہوتا ہے کہ لیڈی ڈاکٹر ہی بلال کو ساتھ لے کر گئی۔ تاہم اسپتال کا عملہ اس لیڈی ڈاکٹر کی شناخت نہیں کر سکا۔ دوسری جانب پولیس نے بلال کے لواحقین کو بتایا ہے کہ بلال کو اغوا کرنے والی لیڈی ڈاکٹر نہیں بلکہ نرس تھی۔
اسلام آباد پولیس کے ترجمان کا کہنا تھا کہ تفتیش کا عمل جاری ہے جس کے دوران اغوا کے اس انوکھے واقعے کے بارے مزید انکشافات کا امکان ہے ۔
