سیالکوٹ میں مسلم لیگ ن کا جلسہ: نوازشریف کا نوجوانوں کو 20،20 سال کے قرضے دینے کا اعلان

پاکستان مسلم لیگ ن کے قائد نوازشریف نے کہا ہے کہ نوجوانوں کو روزگار مہیا کرنا ہمارا منصوبہ ہے، نوجوانوں کو 20، 20 سال کے قرضے دیں گے تاکہ خود کاروبار کریں۔

نوازشریف نے سیالکوٹ میں پارٹی جلسے سے خطاب کرتے ہوئے کہا کہ آج میں بہت خوش ہوں، آپ کہہ رہے ہیں کہ مجھ سے پیار کرتے ہیں، میں کہنے لگا تھا کہ میں بھی آپ سے پیار کرتا ہوں۔

سیالکوٹ کے جلسہ نے گوجرانوالہ کو نیا ٹاسک دے دیا
کیا 03 فروری کو گوجرانوالہ سیالکوٹ کے جلسے کا ریکارڈ توڑے گا؟@kdastgirkhan@KashifSabirpic.twitter.com/DhdD0ljgp6

— PMLN Media (@PmlnMedia) January 28, 2024

ان کا کہنا تھا کہ سیالکوٹ کی موٹروے ہم نے بنائی مگر افتتاح کا موقع نہیں مل سکا، ہم سیالکوٹ موٹروے دوبارہ بنائیں گے۔

8 فروری کو شیر پر جتنی مہریں لگیں گی یہ ملک اتنی ترقی کرے گا، مریم نواز

اس موقع پر پاکستان مسلم لیگ ن کی چیف آرگنائزر و سینیئر نائب صدر مریم نواز نے کہا ہے کہ پاکستان کے نوجوانوں کا مستقبل پیٹرول بم اور کیلوں والے ڈندے نہیں بلکہ آئی ٹی اسٹارٹ اپ ہیں، باعزت روزگار ہے اور اچھی یونیورسٹیاں اور کالجز ہیں۔

مریم نواز نے کہاکہ سیالکوٹ واحد شہر ہے جہاں نواز شریف وطن واپسی کے بعد دوسری بار آ چکے ہیں۔

ووٹ کو صرف ایک پرچی نہ سمجھا جائے

مریم نواز نے کہاکہ 8 فروری کو پاکستان میں عام انتخابات ہونے جا رہے ہیں، اس لیے اُس روز کوئی بھی مسلم لیگ کا ووٹر گھر نہ بیٹھے اور پولنگ بوتھ پر جا کر خود بھی ووٹ ڈالے اور اپنے محلے والوں کو بھی ترغیب دے۔

انہوں نے کہاکہ ووٹ کو صرف ایک پرچی نہ سمجھا جائے اسی نے آپ کی قسمت کا فیصلہ کرنا ہے۔ شیر پر جتنی مہریں لگیں گی یہ ملک اتنی ترقی کرے گا۔

انہوں نے کہاکہ نوازشریف کو خواجہ آصف اور سیالکوٹ سے پیار ہے، اقتدار میں آنے کے بعد یہاں کے مسائل کو حل کریں گے۔

آج سارا ملک نوازشریف کی طرف دیکھ رہا ہے، شہباز شریف

اس سے قبل خطاب کرتے ہوئے پاکستان مسلم لیگ ن کے صدر شہباز شریف نے کہاکہ آج سارا ملک نواز شریف کی طرف دیکھ رہا ہے۔ سیالکوٹ والوں نے فیصلہ سنا دیا ہے کہ 8 فروری کو شیر کی جیت ہوگی، سیالکوٹ والو آئی لو یو ۔