اردن میں ڈرون کی مدد سے امریکی فوجی اڈے پر کیے جانے والے ایک فضائی حملے میں 3 امریکی فوجی ہلاک اور متعدد زخمی ہوگئے ہیں۔
بین الاقوامی میڈیا کے مطابق امریکی حکام نے اس حملے میں 3 فوجی اہلکاروں کے ہلاک اور 25 فوجی اہلکاروں کے زخمی ہونے کی تصدیق کی ہے۔
امریکی حکام کے مطابق یہ فضائی حملہ شامی سرحد کے قریب واقع اردن میں امریکی فوجی اڈے پر کیا گیا ہے۔ انہوں نے الزام لگایا ہے کہ یہ ڈرون حملہ عراق اور شام میں متحرک ایرانی حمایت یافتہ عسکری گروپوں نے کیا ہے۔
میڈیا رپورٹس کے مطابق امریکا نے ڈرون شامی حدود سے لانچ کیے جانے کا امکان ظاہر کرتے ہوئے تحقیات کا آغاز کر دیا ہے۔
یونائیٹڈ اسٹیٹ آف امریکا کی سینٹرل کمانڈ نے حملے کی تصدیق کرتے ہوئے حملے میں 3 اہلکاروں کی ہلاکت اور 25 اہلکاروں کے زخمی ہونے کی اطلاع دی ہے۔
Related Posts
اس واقعے کے بعد وائٹ ہاؤس سے جاری بیان میں کہا گیا ہے کہ امریکی صدر جوبائیڈن نے حملے کی مذمت کرتے ہوئے کہا ہے کہ حملے سے متعلق معلومات اکٹھی کی جارہی ہیں، تاہم ہمیں علم ہے کہ یہ حملہ عراق اور شام میں متحرک ایرانی حمایت یافتہ عسکری گروپوں نے کیا ہے۔
خطہ میں امریکا پر یہ حملہ ایک ایسے وقت میں کیا گیا ہے، جب فلسطین بالخصوص غزہ اسرائیلی فوجیوں کے نشانے پر ہے اور اسرائیلی حکومت کو وائٹ ہاؤس کی مکمل پشت پناہی حاصل ہے۔ خطے میں پیدا ہونے والے حالیہ بحران میں یہ کسی بھی امریکی تنصیب پر یہ پہلا حملہ ہے۔
واضح رہے کہ 5 نومبر 2016 کو بھی اردن ہی میں اردنی سیکیورٹی فورسز نے فضائیہ کے ایک مرکز پر گولیوں کے تبادلے میں امریکا کے 3 فوجی تربیت کاروں کو ہلاک کر دیا تھا۔
