نجی ٹی وی چینل اے آر وائی نیوز کے اینکر پرسن اشفاق ستی نے اہلیہ کی جانب سے عائد کیے گئے گھریلو تشدد کے الزامات پر اپنا موقف دے دیا ہے۔ سماجی رابطے کویب سائٹس پر ویڈیو پیغام جاری کرتے ہوئے کہا کہ ’میں آپ کا وہی ہنستا مسکراتا میزبان ہوں جو اپنی محنت اور مستقل مزاجی سے اس مقام پر پہنچا تھا، اس دوران آپ لوگوں کی جانب سے دی گئی محبت کا میں شکر گزار ہوں‘۔
انہوں نے اہلیہ کی جانب سے لگائے گئے الزامات کا جواب دیتے ہوئے کہا کہ ’کسی بھی معاملے پر مؤقف ہونا بہت ضروری ہے، ہرکہانی کے دورخ ہوتے ہیں۔ میرا میری اہلیہ کے ساتھ جھگڑا ہمارا نجی معاملہ تھا۔ ہر گھر میں میاں بیوی کا جھگڑا ہوتا ہے۔ اس معاملے کو بڑھاوا دے کر میری کردار کشی کی جارہی ہے‘۔
Related Posts
ویڈیو پیغام میں اشفاق ستی کا کہنا تھا کہ ’ایک شخص جو آج تک شریف تھا، اس کو اچانک درندہ بنادیا گیا ہے۔ میری ذاتی زندگی کو جگہ جگہ اچھالا جارہا ہے۔ ان معاملات پر بات کی جارہی ہے جس کے بارے میں کوئی نہیں جانتا ، یہ بہت افسوس کی بات ہے ‘۔
اشفاق ستی کا کہنا تھا کہ میرا اور میری اہلیہ کا معاملہ پولیس کیس ہے اس میں میڈیا ٹرائل نہایت افسوسناک بات ہے۔ میرے اور میری تیسری اہلیہ زارا انصاری کے رشتے کے بارے میں بہت سی باتیں کی جارہی ہیں تو اس کے بارے میں واضاحت دینا ضروری ہے، ہماری شادی کو 3 سال ہوگئے ہیں اور ہمارا ایک پونے 2 سال کا بیٹا بھی ہے۔ زارا کو میری پچھلی شادیوں اور بچوں سے متعلق سب کچھ معلوم ہے۔
اینکر رابعہ انعم کی جانب سے کی گئی پوسٹس کے حوالے سے ان کا کہنا تھا کہ وہ ان کی ایک اچھی کولیگ تھیں انہوں نے مجھ سے ایک بار بھی فون کر کے میرا موقف جاننے کی کوشش نہیں کی گئی، رابعہ کی وجہ سے میں شدید ذہنی اذیت میں مبتلا ہوں ۔
اینکر اشفاق ستی نے رابعہ انعم کو مخاطب کرتے ہوئے کہا کہ اس ذہنی اذیت کی وجہ سے اگر میں نے جان دے دی تو کون ذمہ دار ہوگا؟ مجھے دھمکی آمیز کالز آرہی ہیں ، میں اپنےبچوں سے نہیں مل سکتا ، میں دربدر ہوگیا ہوں۔
واضح رہے کہ گزشتہ روز اینکر اشفاق ستی کی اہلیہ نومیکا اشفاق نے سماجی رابطے کی ویب سائٹ ایکس پرتصاویر شئیر کرتے ہوئے اپنے شوہر پر گھریلو تشدد کے الزامات لگائے تھے جس کے بعد نجی چینل اے آر وائے کی انتظامیہ نے ان کو نوکری سے برطرف کردیا تھا۔
