توشہ خانہ کیس میں بشریٰ بی بی کی سزا پرسابق شوہر خاور مانیکا نے کہا کہ سزا ہورہی ہے یا نہیں میرا اس سے کوئی لینا دینا نہیں ہے، 28 سال وہ میرے ساتھ رہی ہیں، اتنے سالوں کے بعد انہوں نے میرے ساتھ جو کیا اس کا کوئی نہیں پوچھ رہا۔ 5 سال چپ رہا لیکن میں نے اپنا معاملہ اللہ پر چھوڑا دیا ہے۔
بشری بی بی کی توشہ خانہ کیس میں سزا پر سابق شوہر خاور مانیکا کیا کہتے ہیں؟؟؟؟؟ pic.twitter.com/MWr1RfOeqv
— Ghazanfar Abbas (@ghazanfarabbass) January 31, 2024
اسلام آباد ہائیکورٹ میں عمران خان اور بشریٰ بی بی کے دوران عدت نکاح کیس پر فیصلہ محفوظ ہونے کے بعد خاور مانیکا عدالت سے باہر آئے تو صحافیوں نے سوال کرنا شروع کردیے کہ توشہ خانہ کیس میں بشریٰ بی بی کو سزا ہوئی ہے آپ اس پر کیا رد عمل دیں گے، جس پر خاور مانیکا بولے کہ میں نے اپنا معاملہ اللہ پر چھوڑا ہوا ہے۔
مزید پڑھیں
انہوں نے صحافیوں کے سوال کے جواب میں کہا کہ 28 سال بعد وہ مجھے اور بچوں کو چھوڑ کر چلی گئیں، کوئی مجھ سے یہ کیوں نہیں پوچھتا کہ میرے بچوں کا کیا ہوگا۔ سب یہی پوچھ رہے ہیں کہ ان کو سزا ہوگئی آپ کیا کہیں گے۔ میرا اس سب سے کچھ لینا دینا ہی نہیں ہے۔
انہوں نے کہا کہ آپ لوگ میرے ساتھ افسوس کریں گے یا ان کو سزا ہونے پر مبارکبادیں پیش کریں گے، میرا توشہ خانہ سے کوئی تعلق ہی نہیں ہے تو میں کس طرح کہہ سکتا ہوں کہ یہ غلط ہوا ہے یا صحیح ہوا ہے۔ میں کسی کے خلاف بات نہیں کرتا قانون خود ان باتوں کا تعین کر رہا ہے۔
خاور مانیکا نے صحافی کے سوال کے جواب میں کہا کہ عدت میں نکاح سے متعلق کیس پر فیصلہ محفوظ ہوا ہے، انصاف ملے گا یا نہیں مجھے معلوم نہیں ہے لیکن اللہ پر چھوڑ رہا ہوں، جو بھی فیصلہ ہوگا اس کے بعد ہی بات کر سکوں گا۔
واضح رہے احتساب عدالت نے آج سابق وزیر اعظم عمران خان اور ان کی اہلیہ بشریٰ بی بی کو توشہ خانہ کیس میں 14، 14 سال قید بامشقت، 78 کروڑ 70 لاکھ فی کس جرمانہ اور کسی بھی عوامی عہدے کے لیے 10 سال کی نااہلی کی سزا سنائی ہے۔
دوسری جانب اسلام آباد ہائیکورٹ نے عمران خان اور بشریٰ بی بی کی عدت کے دوران نکاح کے کیس کا فیصلہ محفوظ کر لیا ہے۔
