انگلینڈ میں ایک پرانی الماری سے 285 سال پرانا لیموں برآمد ہوا جو 1739 میں ایک شخص نے اپنی کسی دوست کو پیش کیا تھا، اس تاریخی لیموں کو 1780 ڈالر میں نیلام کر دیا گیا ہے۔
شرپ شائر میں بریٹلز آکشنرز نے بتایا کہ ایک خاندان کی جانب سے 19 ویں صدی کی ایک الماری نیلام گھر میں لائی گئی جس کا کہنا تھا کہ یہ الماری ان کے ایک مرحوم چچا کی یاد گار ہے۔
اس دوران ایک دلچسپ بات سامنے آئی کہ اس الماری کی نیلامی کے لیے ایک ماہر تصویر کھینچ رہا تھا کہ اس کی اچانک نظر الماری کے ایک دراز کے پچھلے حصے پر پڑی، جب اس نے دیکھا تو یہ ایک بڑے سائز کا لیموں تھا۔
اس لیموں پر یہ پیغام لکھا ہوا تھا کہ ’ یہ لیموں مسٹر پی لو فرنچنی نے 4 نومبر 1739 کو مس ای بیکسٹر کو بطور تحفہ میں دیا۔
جب اس لیموں پر لکھی تاریخ کا جائزہ لیا گیا تو یہ 285 سال پرانا نکلا، اس میں جو بات مزید حیران کر دینے والی تھی کہ تقریباً 3 صدیوں کے قریب پہنچنے والا یہ لیموں ابھی تک خراب نہیں ہوا اور یہ اپنی اصل حالت میں موجود تھا۔
نیلام گھر کے حکام نے اس لیموں کو تاریخی قرار دیتے ہوئے اسے نیلامی کے لیے پیش کرنے کا فیصلہ کیا تو حکام یہ جان کر اور بھی حیران رہ گئے کہ اس لیموں کی آخری بولی 1 ہزار 780 ڈالر یعنی پاکستان روپوں میں 5 لاکھ ایک ہزار 960 روپے پر ختم ہوئی۔
جب کہ اس لیموں کے ساتھ لائی جانے والی الماری محض 40 ڈالر یعنی پاکستان 11 ہزار 280 روپوں میں فروخت ہوئی۔
