پاکستان کی انڈر 19 کرکٹ ٹیم نے آئی سی سی ورلڈ کپ کے سپر 6 مرحلے کے اہم میچ میں بنگلادیش کو شکست دیتے ہوئے سیمی فائنل کے لیے کوالیفائی کر لیا ہے۔
جنوبی افریقہ کے شہر بینونی میں کھیلے گئے میچ میں پاکستان انڈر19 کرکٹ ٹیم نے پہلے بیٹنگ کرتے ہوئے 155 رنز اسکور کیے۔
پاکستان کی جانب سے عرفات منہاس 34 رنز بنا کر ٹاپ اسکورر رہے، اس کے علاوہ شاہزیب خان 26، شامل حسین اور علی اسفند نے 19،19 رنز بنائے۔
مزید پڑھیں
بنگلہ دیشی بولرز کی جانب سے روہانات بورسن اور شیخ جبون نے 4،4 کھلاڑیوں کو پویلین کی راہ دکھائی، جبکہ محفوظ الرحمان نے ایک کھلاڑی کو آؤٹ کیا۔
اس کے بعد جب بنگلہ دیش کی بیٹنگ کا آغاز ہوا تو پاکستانی بولر عبید شاہ نے تباہ کن بولنگ کا مظاہرہ کرتے ہوئے 5 کھلاڑیوں کو پویلین کی راہ دکھاتے ہوئے ٹیم کی جیت میں اہم کردار ادا کیا۔
اس کے علاوہ علی رضا نے 3 کھلاڑی آؤٹ کیے جبکہ محمد ذیشان کے حصے میں ایک وکٹ آئی۔
واضح رہے کہ پاکستان نے سنسنی خیز مرحلے کے بعد میچ 5 رنز سے جیتتے ہوئے سیمی فائنل میں جگہ بنا لی ہے۔
