نگراں وزیراعظم انوارالحق کاکڑ نے کہا ہے کہ ذمہ داریوں سے سبکدوش ہونے کے بعد کچھ وقت کے لیے آرام کروں گا اور پھر اس کے بعد سیاست میں ہی رہوں گا کیونکہ جو ایک بار سیاست میں آ جائے وہ اس کو ترک نہیں کر سکتا۔
نگراں وزیراعظم انورالحق کاکڑ نے حال ہی میں ایک نجی ٹی وی کے پروگرام میں شرکت کی جہاں انہوں نے مختلف سوالوں کے جوابات دیے۔
مزید پڑھیں
نگراں وزیراعظم نے کہاکہ ابھی یہ واضح نہیں کہ میں کس جماعت کے پلیٹ فارم سے سیاست کروں گا یہ وقت دیکھ کر فیصلہ کیا جائے گا۔
انوارالحق کاکڑ نے ایک سوال کے جواب میں کہاکہ جو لوگ کہہ رہے تھے کہ انتخابات ملتوی کرنے کے لیے سازشیں کی جا رہی ہیں ان کا بیانیہ غلط ثابت ہوا اور اب ملک میں الیکشن ہونے جا رہے ہیں۔
ان کا مزید کہنا تھا کہ نگراں حکومت نے اپنے دور میں معیشت کو درست سمت پر گامزن کیا، ابھی اس پوزیشن میں آ چکے ہیں کہ شرح سود کو کم کیا جائے۔
انوارالحق کاکڑ نے کہاکہ منتخب حکومت کو اقتدار منتقل کرنے کے بعد نئی کابینہ کے ساتھ ایک مشترکہ اجلاس رکھیں گے جس میں انہیں اپنے دور میں کیے گئے اقدامات کے حوالے سے آگاہ کیا جائے گا اور یہ ایک نئی روایت ہوگی۔