دوسروں کو چور ڈاکو کہنے والا عمران خان سب سے بڑا کرپٹ نکلا، شہبازشریف

سابق وزیراعظم و صدر پاکستان مسلم لیگ ن شہباز شریف نے کہا ہے کہ پی ٹی آئی کے پاس بلے کا انتخابی نشان ہوتا تو ہم پھر بھی بھرپور طریقے سے انتخابات میں حصہ لیتے اور زیادہ محنت کرتے، دوسروں کو چور ڈاکو کہنے والا عمران خود سب سے بڑا کرپٹ نکلا۔

نجی ٹی وی کو دیے گئے انٹرویو میں انہوں نے کہاکہ مسلم لیگ ن بھرپور طریقے سے الیکشن میں حصہ لے رہی ہے اور الیکشن کے بعد ہمارے وزارت عظمیٰ کے امیدوار نواز شریف ہوں گے جبکہ وزیراعلیٰ پنجاب کا فیصلہ بعد میں مشاورت سے ہوگا۔

سانحہ 9 مئی میں ملوث افراد کسی رعایت کے مستحق نہیں

سابق وزیراعظم نے کہاکہ تحریک انصاف کے سینکڑوں لوگ الیکشن میں حصہ لے رہے ہیں لیکن جو لوگ 9 مئی کی سازش میں ملوث ہیں وہ کسی رعایت کے مستحق نہیں۔

شہباز شریف نے کہاکہ نواز شریف کی حکومت 3 بار ختم کی گئی مگر انہوں نے کبھی بھی فوجی قیادت کے خلاف بات نہیں کی۔ جبکہ عمران خان نے اقتدار جانے کے بعد اپنی ہی فوج کے سپہ سالار کو میر جعفر اور میر صادق قرار دیا۔

ایک سوال کے جواب میں انہوں نے کہاکہ نواز شریف کو عمران خان کی کابینہ نے ملک سے باہر بھیجنے کی منظوری دی تھی کیونکہ اس وقت شوکت خانم اسپتال کے ڈاکٹر نے بھی یہ کلیئر کیا تھا کہ نواز شریف کے پلیٹ لیٹس خطرناک حد تک گر گئے ہیں۔

2013 سے 2018 تک ایک بھی سیاسی قیدی نہیں تھا

ایک سوال کے جواب میں شہباز شریف نے کہاکہ 2013 سے 2018 تک مسلم لیگ ن کے دور حکومت میں ایک بھی سیاسی قیدی نہیں تھا جبکہ عمران خان نے ہم سے انتقام لیا اور تمام مقدمات جھوٹے ثابت ہوئے۔

شہباز شریف نے کہاکہ مسلم لیگ ن نے اپنے انٹراپارٹی انتخابات الیکشن کمیشن کے قوانین کے مطابق کرائے ہیں جس کا ریکارڈ موجود ہے۔

ایک سوال کے جواب میں انہوں نے کہاکہ شاہد خاقان عباسی کیوں ہمیں چھوڑ گئے ہیں یہ ان سے پوچھا جائے۔ ’شاہد خاقان عباسی کے حوالے سے بات نہیں کرنا چاہتا، بات نکلی تو بہت دور تلک جائے گی‘۔

ایک اور سوال کے جواب میں انہوں نے کہاکہ گزشتہ دور حکومت میں حمزہ شہباز پنجاب اسمبلی میں اپوزیشن لیڈر تھا اور جب عدم اعتماد ہوئی تو وزارت اعلیٰ اسی کا حق بنتا تھا۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں