پاکستان نیول اکیڈمی کراچی میں 124 ویں مڈ شپ مین اور 32 ویں شارٹ سروس کمیشن کورس کے کیڈٹس کی پاسنگ آؤٹ پریڈ کا شاندار انعقاد ہوا، جس میں بین الاقوامی مہمان خصوصی بھی شریک ہوئے۔
یہ بھی پڑھیں:پاکستان نیوی کا بحیرہ عرب میں جدید ترین میزائل کا کامیاب تجربہ
میڈیا رپورٹ کے مطابق کراچی میں ہونے والی تقریب کے مہمان خصوصی کمانڈر رائل بحرین نیول فورس ریئر ایڈمرل احمد محمد ابراہیم آل بن علی تھے۔ اس موقع پر پاک بحریہ کے سربراہ ایڈمرل نوید اشرف نے مہمان خصوصی کا پرتپاک استقبال کیا۔
کیڈٹس نے پاک بحریہ کے سربراہ کو سلامی دی، جبکہ ریئر ایڈمرل احمد محمد ابراہیم آل بن علی نے پریڈ کا معائنہ کیا اور کیڈٹس کی کارکردگی کو سراہا۔
ریئر ایڈمرل نے پریڈ سے خطاب کرتے ہوئے کہا کہ پاکستانی نیول اکیڈمی سے فارغ التحصیل ہونے پر فخر ہے، اور کیڈٹس اپنی بہترین صلاحیتوں سے ملک و قوم کے لیے فائدہ مند ثابت ہوں۔
انہوں نے مزید کہا کہ دوسرے ممالک کے کیڈٹس کو تربیت دینا پاکستان نیول اکیڈمی کے لیے قابلِ فخر ہے، اور پاکستان کے ساتھ اسلامی اخوت کے مضبوط رشتے ہیں۔ پیشہ ورانہ زندگی میں کردار کی اہمیت کو ہمیشہ مدنظر رکھنا چاہیے۔
