الیکشن کمیشن آف پاکستان نے عام انتخابات 2024 میں حصہ لینے والے تمام امیدواروں اور سیاسی جماعتوں کو خبردار کیا ہے کہ وہ 6 فروری کی رات 12 بجے کے بعد جلسے جلوس، کارنر میٹنگ یا کسی بھی قسم کی سرگرمی جو الیکشن مہم کے زمرے میں آتی ہو نہ کریں۔
الیکشن کمیشن نے اپنی پریس ریلیز میں کہا ہے کہ الیکشنز ایکٹ 2017 کی سیکشن 182 کے مطابق آج 6 فروری کی شب 12 بجے کے بعد کوئی بھی شخص کسی بھی جلسے ، جلوس، کارنر میٹنگ یا اس نوعیت کی سیاسی سر گرمی کا نہ تو انعقاد کرے گا اور نہ ہی اس میں شرکت کرے گا۔
مزید پڑھیں
الیکشن کمیشن نے انتخابات میں حصہ لینے والے امیدواروں اور سیاسی جماعتوں کو خبردار کیا ہے کہ کوئی بھی شخص جو قانون کی مذکورہ بالا شق کی خلاف ورزی کرے گا اس کے خلاف قانونی کارروائی عمل میں لائی جائے گی۔
الیکشن کمیشن نے واضح کیا ہے کہ انتخابی مہم ، اشتہارات و دیگر تحریری مواد کی الیکٹرانک اور پرنٹ میڈیا پر تشہیر پرپابندی ہے جس سے کسی خاص سیاسی پارٹی یا امیدوار کی حمایت یا مخالفت کا شبہ ہو، اس کے علاوہ انتخابی عمل کے انعقاد تک میڈیا پر ہر قسم کے پول سروے پر بھی پابندی ہو گی۔
#ECP pic.twitter.com/ud4HyvLAX1
— Election Commission of Pakistan (OFFICIAL)🇵🇰 (@ECP_Pakistan) February 6, 2024
میڈیا کو ہدایت کرتے ہوئے الیکشن کمیشن نے کہا ہے کہ میڈیا پولنگ کے اختتام کے ایک گھنٹہ گزرنے کے بعد پولنگ رزلٹ کی نشریات شروع کر سکتا ہے جس میں یہ واضح طور پر بتایا جائے گا کہ یہ رزلٹ غیر حتمی و غیر سرکاری ہیں۔
الیکشن کمیشن نے کہا ہے کہ ریٹرنگ آفیسر ز پولنگ اسٹیشنوں کا پراگریسو رزلٹ اور مکمل غیر حتمی رزلٹ جاری کریں گے،الیکٹرانک و پرنٹ میڈیا کوڈ آف کنڈکٹ پر سختی سے عمل کرے، خلاف ورزی پر پیمرا اور پی ٹی اے کو قانونی کاروائی کرنے کی ہدایات جاری کر دی گئی ہیں۔
