پورے پاکستان میں شیر پر ٹھپہ لگانے کی مہم چلانے والے ن لیگ کے قائد میاں محمد نواز شریف، ان کے بھائی میاں محمد شہباز شریف اور بھتیجے حمزہ شہباز خود عقاب پر مہر لگائیں گے۔
یہ دلچسپ صورتحال اس لیے پیش آرہی ہے کیوں کہ میاں نوازشریف، میاں شہباز شریف اور حمزہ شہباز کا ووٹ حلقہ 128 ماڈل ٹاؤن میں رجسٹرڈ ہے اور لاہور کے اس حلقے میں ن لیگ کی استحکام پاکستان پارٹی کے ساتھ سیٹ ایڈ جسٹمنٹ ہوگئی ہے۔
مزید پڑھیں
اس سیٹ ایڈجسٹمنٹ کی وجہ سے ن لیگ کا قومی حلقے کی اس سیٹ پر امیدوار ہی نہیں ہے اور یہ حلقہ اس وقت استحکام پاکستان پارٹی کے امیدوار عون چودھری کا ہے جن کا انتخابی نشان عقاب ہے اور جنہیں ن لیگ کی سپورٹ حاصل ہے۔
اس لیے کہا جاسکتا ہے کہ سابق وزرائے اعظم میاں نوازشریف، میاں شہباز شریف اور سابق وزیراعلیٰ پنجاب حمزہ شہباز شریف 8 فروری کو قومی اسمبلی کی سیٹ پر استحکام پاکستان پارٹی کے عون چودھری کو ووٹ ڈالیں گے۔
تاہم شیر پر مہر لگانے کا فریضہ وہ صوبائی اسمبلی کے ن لیگی امیدورارں کے ناموں کے آگے مہر لگا کر سرانجام دے سکیں گے۔
