پاکستان تحریک انصاف کے رہنما خرم شیر زمان نے الزام عائد کیا ہے سندھ پولیس کے درجنوں اہلکاروں نے فارم 45 چوری کرنے یا انہیں مارنے کی غرض سے ان کے گھر پر چھاپہ مارا اور ان کے بیوی بچوں کو ڈرایا۔
اپنے ایک ویڈیو پیغام میں پی ٹی آئی رہنما خرم شیر زمان نے بتایا کہ گزشتہ رات پولیس کی بھاری نفری اور سادہ لباس میں ملبوس درجنوں پولیس اہلکاروں نے ان کے گھر چھاپہ مارا۔
مزید پڑھیں
انہوں نے کہا، ’مجھے خدشہ تھا کہ پولیس فارم 45 چوری کرنے یا مجھے اغوا یا قتل کرنے کے لیے آئی ہے، میری جان کو خطرہ ہے۔‘ خرم شیر زمان نے کہا کہ الیکشن میں ہمارا مینڈیٹ چھینا گیا، عدالتوں میں جانا اور احتجاج کرنا ہمارا حق ہے۔
I strongly condemn the unjust and intimidatory tactics employed by both uniformed & plainclothes police officers during raid at my residence last night. I’m requesting CJP, COAS & IG Sindh to take notice of this ongoing harassment against me & my family.@OfficialDGISPR @IGSindh pic.twitter.com/g8PV2PHLef
— Khurrum Sher Zaman NA-241 (@KhurumSherZaman) February 11, 2024
انہوں نے کہا، ’میں چیف آف آرمی اسٹاف جنرل عاصم منیر سے بھی کہنا چاہتا ہوں کہ میں شہید کا بھائی ہوں، میرا بھائی ائیر فورس میں تھا جو شہید ہوا ہے، میرے گھر کی حفاظت کرنا، شہید کے گھر کی حفاظت کرنا افواج پاکستان کی بھی ذمہ داری ہے۔‘
انہوں نے کہا کہ سندھ پولیس آدھی رات کو گھر میں گھس کر میری بیوی اور بچوں کو ڈرا رہی ہے۔ انہوں نے آئی جی سندھ اور چیف جسٹس سے واقعہ کا نوٹس لینے کا مطالبہ کیا اور کہا کہ ہم پاکستانی ہیں، ہمارے ساتھ ایسا سلوک نہ کیا جائے۔