’وی نیوز‘ کو دیے گئے اپنے خصوصی انٹرویو میں تحریک انصاف پنجاب کی صدر یاسمین راشد نے کہا ہے کہ ’میری جنرل فیض سے کوئی لڑائی نہیں ہے کہ میں آرٹیکل چھ کا ذکر کروں۔ باجوہ صاحب کے حوالے سے اس لیے کہتے ہیں کہ انہوں نے خود کہا کہ وہ مداخلت کرتے رہے ہیں‘۔
تحریک انصاف کی سینیئر رہنما اور سابق صوبائی وزیر صحت ڈاکٹر یاسمین راشد کا کہنا ہے کہ عمران خان پر قاتلانہ حملہ ہوا لیکن ہماری ایف آر نہیں کاٹی گئی۔ ہم چاہتے تھے ڈرٹی ہیری ،رانا ثناء اللہ اور وزیر اعظم شہباز شریف پر ایف آئی آر درج ہو، مگر ہماری ایف آئی آر درج نہیں ہوئی۔
ہمیں عمران خان کی سیکیورٹی کی فکر ہو گئی ہے
ان کا کہنا تھا جب عمران خان پر قاتلانہ حملہ ہوا، انہیں گولیاں لگیں اس وقت میں اس کنٹینر پر موجود تھی۔ ہم گھر سے نکلتے ہیں تو ہم سب سے پہلے ان کی سیکیورٹی کا سوچتے ہیں۔ اگر خان صاحب کو گرفتار کر لیتے ہیں تو ہمیں ان کی سیکیورٹی کی فکر ہوگی۔
عمران خان نے نواز شریف کا حال پوچھنے کا کہا تھا
سابق وزیر صحت کا کہنا تھا کہ جب نواز شریف سروسز ہسپتال میں زیر علاج تھے تو جنرل باجوہ نےکوئی کال نہیں کی، البتہ عمران خان نے مجھے نواز شریف کے پاس بھیجا تھا کہ میری طرف ان کی طبیعت پوچھیے، اگر وہ باہر سے معالج بلوانا چاہتے ہیں تو ہم بلوا لیتے ہیں۔ عمران خان نے مجھ سے نواز شریف کی صحت کے حوالے سے اپنے خدشات کا اظہار کیا تھا۔ نواز شریف جب سروسز ہسپتال آئے تو ان کے پلیٹلس گرے ہوئے تھے۔ ہم نے ان کی بیماری کا پتا لگا لیا تھا اور یہاں پر ان کا علاج بھی شروع ہوگیا تھا۔
مجھ سے کوئی فوجی بات نہیں کرتا
تحریک انصاف کی سینیئر رہنما کا کہنا تھا کہ مجھ سے کوئی فوجی بات نہیں کرتا، نہ ہی میں ان سے بات کرتی ہوں۔ نواز شریف کےعلاج کے حوالے سے جنرل باجوہ کا کیا کام کہ وہ مجھے سے بات کرتے۔
مریم نواز کے خلاف الیکشن لڑوں گی
ڈاکٹر یاسمین راشد نے وی نیوز کو انٹرویو میں کہا کہ اگر عمران خان نے مجھے قومی اسمبلی کا ٹکٹ دیا تو میں ضرور مریم نواز کے خلاف الیکشن لڑوں گی۔ میں امید کرتی ہوں کہ الیکشن وقت پر ہوں اس میں ملک کی بہتری ہے۔ جتنی جلدی ہو سکے تمام الیکشن کروائے جائیں۔ ہم بجٹ کے بعد الیکشن پر متفق نہیں ہیں۔ ہم چاہتے ہیں فوری الیکشن ہوں۔
پرویز الہی کو پنجاب کا ٹکٹ ملے گا ؟
ایک سوال کے جواب میں ڈاکٹر یاسمین راشد کا کہنا تھا کہ پرویز الٰہی کو سینیئرصدر بنایا جا رہا ہے۔ انہیں صوبائی اسمبلی کا ٹکٹ مل رہا ہے یا نہیں اس بارے میں پرویز الٰہی سے پوچھیں۔
واضح رہے کہ ڈاکٹر یاسمین پاکستان تحریک انصاف پنجاب کی صدر ہیں جن کا پارٹی کی پنجاب میں صوبائی اسمبلی کی ٹکٹوں کی تقسیم میں بھی اہم کردار ہے۔
