پاکستان تحریک انصاف (پی ٹی آئی) نے پاکستان مسلم لیگ ن اور پیپلزپارٹی کو ایک ہی سکے کے دو رخ قرار دیتے ہوئے کہا ہے کہ عمران خان اس بوسیدہ نظام کو بدلنے کے لیے بے مثال قربانیاں دے رہے ہیں۔
چیئرمین پی پی پی بلاول بھٹو کی پریس کانفرنس پر ردعمل دیتے ہوئے پی ٹی آئی نے کہاکہ حکومت سازی کا حق تحریک انصاف کا ہے کیونکہ ہمارے پر اکثریت ہے۔
مزید پڑھیں
ترجمان پی ٹی آئی نے کہاکہ ہم ان کی ہر سازش اور پسِ پردہ مک مکا کا توڑ نکال کر ملک و قوم کو ان کے شر سے محفوظ بنائیں گے۔
انہوں نے کہاکہ عوام کی جانب سے مسترد کیے جانے کے بعد پی ڈی ایم کی جانب سے نئے ناٹک کا آغاز کردیا گیا ہے۔
ترجمان نے کہاکہ آصف زرداری کے فرزند کی سوچ جمہوری ہوتی تو شریف برادران کے ساتھ مک مکا کی نئی مہم چلانے کے بجائے تحریک انصاف کو میسر عوامی مینڈیٹ تسلیم کرتے اور ووٹ کی کھلی بے حرمتی کی مذمت کرتے۔
انہوں نے کہاکہ عوامی مینڈیٹ کو تسلیم کرنے کے حوالے سے بلاول بھٹو کی جماعت سیاہ تاریخ کی حامل ہے۔
بلاول اپنے والد کے اشاروں پر چل رہا ہے
ترجمان پی ٹی آئی کا کہنا تھا کہ آج بلاول اپنے والد کے اشاروں پر اپنی خاندانی اور موروثی سیاست کو ننگی بددیانتی اور اقتدار کی بندر بانٹ کے ذریعے زندہ رکھنے کی کوششیں کررہا ہے۔
ترجمان نے کہاکہ آئینی، حکومتی اور پارلیمانی عہدوں کی آپس میں تقسیم کے بعد باہم فاصلوں کی اداکاری ان کے کسی کام آئے گی نا عوام ان کے جھانسے میں آئیں گے۔
انہوں نے کہاکہ قوم جانتی ہے کہ پیپلزپارٹی اور ن لیگ عوام کو مہنگائی کی دلدل میں دھنسانے اور ملکی معیشت کو تباہ کرنے کے ذمہ دار ہیں۔ قوم کی آئندہ نسلوں کو گروی رکھ کر اپنی موجودہ اور آئندہ نسلوں کے مستقبل کو محفوظ بنانے کے مکروہ منصوبے عوام خاک میں ملائیں گے۔
