سندھ ہائیکورٹ نے الیکشن پٹیشنز کی سماعت کے لیے ٹریبیونلز تشکیل دیدیے

سندھ ہائیکورٹ نے صوبے میں انتخابی نتائج میں مبینہ بے قاعدگیوں اور تنازعات سے متعلق درخواستوں پر سماعت کے لیے الیکشن ٹریبیونلز تشکیل دے دیے ہیں۔

چیف جسٹس سندھ ہائیکورٹ جسٹس عقیل احمد عباسی نے صوبے بھر میں الیکشن پٹیشنز کی سماعت کے لیے ٹریبیونلز تشکیل دیے ہیں۔

اس سلسلے میں جاری نوٹیفیکیشن کے مطابق، کراچی ڈویژن کے لیے پرنسپل سیٹ ہائیکورٹ میں الیکشن پٹیشن کی سماعت ہوگی۔ کراچی ڈویژن میں الیکشن پٹیشنز کی سماعت کے لیے 2 بینچ تشکیل دیے گئے ہیں۔ بینچ ون جسٹس محمد کریم خان آغا اور بینچ ٹو جسٹس عدنان اقبال چوہدری پر مشتمل ہوگا۔

سکھر ڈویژن میں الیکشن پٹیشنز کی سماعت جسٹس محمد اقبال کلہوڑو اور حیدر آباد ڈویژن میں جسٹس امجد علی سہتو کریں گے۔ لاڑکانہ ڈویژن میں الیکشن پٹیشنز کی سماعت جسٹس محمد سلیم جیسر کریں گے۔

رجسٹرار سندھ ہائیکورٹ کی جانب سے جاری نوٹی فکیشن میں کہا گیا ہے کہ صوبائی الیکشن کمیشن نے صوبے میں الیکشن پٹیشنز کی سماعت کے لیے ٹریبیونلز کی تشکیل کے لیے خط لکھا تھا۔ الیکشن ٹریبونلز انتخابات میں ہونے والی مبینہ دھاندلی سے متعلق شکایات کی سماعت کرے گا۔