پاکستان سپر لیگ (پی ایس ایل) کے 9ویں ایڈیشن کی رنگا رنگ افتتاحی تقریب لاہور کے تاریخی قذافی اسٹیڈیم میں ہوگی جس میں علی ظفر، آئمہ بیگ، عارف لوہار اور نوری بینڈ پرفارم کرے گا۔ افتتاحی تقریب شام ساڑھے 6 بجے شروع ہوگی جس میں شاندار آتش بازی اور لیزر شو کا مظاہرہ بھی کیا جائے گا۔ تقریب کے بعد ایونٹ کا افتتاحی میچ رات 8 بجے شروع ہوگا، جس میں دفاعی چیمپیئن لاہور قلندرز کا مقابلہ اور 2 مرتبہ کی چیمپیئن اسلام آباد یونائیٹڈ سے ہوگا۔
پاکستان سپر لیگ (پی ایس ایل) کے 9ویں ایڈیشن میں 34 میچز کھیلے جائیں گے جس کے پہلے مرحلے کے میچز لاہور اور ملتان میں کھیلے جائیں گے جبکہ دوسرے مرحلے کے میچز کی میزبانی کراچی اور راولپنڈی کریں گے۔
پی ایس ایل 9 کے فائنل میچ کی میزبانی بھی اس مرتبہ کراچی کو دی گئی ہے اور 18 مارچ کو نیشنل اسٹیڈیم میں فائنل میچ کھیلا جائے گا۔ ایونٹ کے 34 میچوں میں سے 7 ڈبل ہیڈر ہوں گے۔ کراچی سب سے زیادہ 11 میچوں کی میزبانی کرے گا جن میں کوالیفائر، 2 ایلیمینیٹرز اور فائنل شامل ہیں۔
لاہور کا قذافی اسٹیڈیم اور راولپنڈی کا پنڈی کرکٹ اسٹیڈیم 9، 9 میچز کی میزبانی کرے گا جبکہ ملتان میں 5 میچز کھیلے جائیں گے۔ ابتدائی 3 سال تک شاندار ترانے گانے والے علی ظفر نے کئی برس بعد پھر پی ایس ایل کے ترانے میں اپنی آواز کا جادو جگایا ہے اور یہ ترانہ بھی بے پناہ مقبول ہوا ہے۔
رمضان المبارک کے دوران میچ کب کھیلے جائیں گے؟
پاکستان کرکٹ بورڈ (پی سی بی) نے رمضان المبارک کے دوران میچوں کے اوقات کا اعلان کیا ہے، امکان ہے کہ رمضان المبارک کا آغاز 10 یا 11 مارچ سے ہوگا۔ رمضان میں پی ایس ایل کے میچز رات 9 بجے شروع ہوں گے تاکہ کرکٹرز سمیت شائقین نماز ادا کرکے اسٹیڈیم کا رُخ کرسکیں۔ دنیا بھر سے مختلف ممالک کے کھلاڑیوں نے اپنی ٹیم کو جوائن کر لیا ہے جبکہ ٹیموں کا کہنا ہے کہ ان کہ تیاری مکمل ہے۔
