انوکھا الیکشن تھا گوگل بھی پریشان ہے کہ رزلٹ کیا ہے؟ شاہد خاقان عباسی

سابق وزیر اعظم شاہد خاقان عباسی نے کہا ہے کہ یہ انوکھا الیکشن تھا کہ گوگل بھی پریشان ہے کہ رزلٹ کیا ہے، الیکشن کمیشن کا کمال ہے کہ فارم 47 پہلے ہی بن گیا تھا۔ اقتدار کی سیاست سے نکل کر ملک کے مسائل کا سوچیں، عوام کی تکالیف کے حل کی بات کریں۔

احتساب عدالت کراچی کے باہر میڈیا سے گفتگو کرتے ہوئے شاہد خاقان عباسی نے کہا کہ فارم 45 اور فارم 47 کا مسئلہ ہے، فارم 47 والا جیتا ہوا ہے۔ میں نے پہلے ہی کہا تھا کہ حالات بہتر ہو جائیں تو الیکشن کرائیں وگرنہ انتشار ہوگا، میری بات درست ثابت ہوئی دیکھ لیا کہ کیا ہوا ہے اور کیا ہوگا۔

شاہد خاقان عباسی نے کہا کہ اس طرح آپ معاملات کو ٹھیک نہیں کرسکتے، آج کوئی بھی اقتدار کا مستحق نہیں مسئلہ ملک کا ہے، ملک کی بات کریں، یہ ایک ناکام الیکشن ہے۔

سابق وزیر اعظم کا کہنا ہے کہ ہر آدمی اقتدار کی بات کر رہا ہے کہ مجھے اقتدار مل جائے، جو جتنا کمپرومائز کرے گا وہ حکومت بنالے گا، جو بھی حکومت میں آیا تمام جماعتیں ساتھ نہیں دیں گی تو حکومت کامیاب نہیں ہوسکتی۔

ایک سوال کے جواب پر شاہد خاقان عباسی نے کہا کہ اب فارم 47 سے کمپرومائز کرنا ہوگا۔ اپنے کیس سے متعلق ان کا کہنا تھا کہ 5واں سال ہے کیس چلتا ہے نہ یہ پتا چلتا ہے الزام کیا ہے؟ یاد رہے کہ سابق ایم ڈی پی ایس او کی غیرقانونی بھرتی کے ریفرنس کی سماعت کے لیے سابق وزیراعظم شاہد خاقان عباسی احتساب عدالت میں پیش ہوئے تھے۔